jimmy

ພະຍາດໄຂ້ເລືອດອອກ

Date . Posted in Science

DengueFeverເຂົ້າສູ່ຍາມຝົນທຸກປີ ກໍມັກໄດ້ຍິນການລາຍຂ່າວລາຍວັນໂລດວ່າ ໄລຍະນີ້ທົ່ວປະເທດມີ
ຄົນເປັນໄຂ້ເລືອດອອກ ທໍ່ໃດຄົນ???

ເຄີຍສົງໄສກັນບໍ່ເປັນຫຍັງໄຂ້ເລືອດອອກຈຶ່ງແກ້ໄດ້ບໍ່ຂາດຈັກເທື່ອ ສ່ວນໂຕ Admin ຄຶດວ່າ ສາເຫດຫລັກໆກໍຍ້ອນປະເທດເຮົານອນໃນເຂດຮ້ອນຊຸ່ມ ເຮັດໃຫ້ມີຍຸງຫລາຍ ການແກ້ໄຂຄົງ
ເຮັດໄດ້ຍາກ ຂະຫນາດໃນປະເທດໃກ້ຄຽງທີ່ຈະເລີນກວ່າລາວເຮົາ ທັງມາເລເຊຍ ໄທ… ກໍຍັງ
ປະສົບບັນຫານີ້ເຊັ່ນກັນ.


ການຈະແກ້ບັນຫານີ້ໃຫ້ຫາຍຂາດໄປຄົງເຮັດໄດ້ຍາກ ແຕ່ທີ່ເຮົາເຮັດໄດ້ກໍແມ່ນການຫລຸດຜ່ອນຈຳນວນຄົນເປັນໄຂ້ເລືອດອອກ ແລະຫລຸດ
ຜ່ອນຄົນທີ່ເສຍຊີວິດລົງໄດ້ ຖ້າທຸກຄົນຊ່ອຍກັນລົງມືປະຕິບັດ ເຊິ່ງ Admin ເຊື່ອວ່າທຸກຄົນຄົງຮູ້ດີກໍຄືການທຳລາຍ ແຫລ່ງແຜ່ພັນຂອງ
ຍຸງລາຍ ແຕ່ຈະມີຈັກຄົນທີ່ສົນໃຈເຮັດແທ້ໆ ບໍ່ໄດ້ເຮັດຕາມກະແສເຮັດໆເຊົາໆ.

ສະນັ້ນມື້ນີ້ Page ວິທະຍາສາດ ຈະພາທ່ານໄດ້ຮູ້ຈັກໄຂ້ເລືອດອອກດີຂຶ້ນ ໄດ້ຮູ້ວ່າມັນແມ່ນຫຍັງ ເປັນແນວໃດ ອາການສະແດງອອກຈັ່ງໃດ ແລະຈະປ້ອງກັນໂຕເອງແນວໃດ ແບບຮູ້ເລິກຮູ້ແຈ້ງດ້ານວິທະຍາສາດ

 

ໄຂ້ເລືອດອອກ ພະຍາດອັນຕະລາຍເຖິງຊີວິດ2

ໄຂ້ເລືອດອອກ ເປັນພະຍາດທີ່ມີສາເຫດມາຈາກເຊື້ອໄວຣັສ 2 ຊະນິດຫລັກໆຄື: ເຊື້ອ ເດັງກີ (Gengue) ແລະເຊື້ອຊິກຸຸນຄຸນຢາ (Chigunkunya) ສຳລັບໃນບ້ານເຮົາສ່ວນໃຫຍ່ຈະແມ່ນເຊື້ອເດັງກີຫລາຍກວ່າ ໂດຍໄຂ້ເລືອດອອກຈະຕິດຕໍ່ກັນໂດຍຜ່ານພາຫະ ກໍຄືຍຸງລາຍ ຫມາຍຄວາມວ່າ ຍຸງລາຍໄປກັດຄົນທີ່ມີເຊື້ອເດັງກີ ແລ້ວໄປກັດຄົນອື່ນຕໍ່ເຮັດໃຫ້ຕິດເຊື້ອກັນໄດ້.

ສາເຫດທີ່ເອີ້ນວ່າ ໄຂ້ເລືອດອອກ ກໍຍ້ອນວ່າ ເມື່ອຕິດພະຍາດນີ້ແລ້ວ ຈະມີອາການຊຶມຮົ່ວຂອງນ້ຳເຫລືອງອອກຈາກເສັ້ນເລືອດ ເຮັດໃຫ້ຄວາມ
ເຂັ້ມຂຸ້ນຂອງເລືອດເພີ່ມຂຶ້ນ ຈົນກາຍມາເປັນອາການຕ່າງໆທີ່ສະແດງອອກເຊັ່ນ: ເລືອດດັງອອກ, ເລືອດອອກຢູ່ໃນເຫຍື່ອຕາ, ເລືອດອອກຕາ
ເຫືອກ… ກໍລະນີທີ່ເປັນຫນັກໆກໍແມ່ນເລືອດອອກໃນກະເພາະ ແລະລຳໄສ້ ຈົນຮາກອອກມາເປັນເລືອດ.

ປົກກະຕິແລ້ວເຊື້ອ ເດັງກີ ມີເຖິງ 4 ສາຍພັນ ສະນັ້ນຄົນທີ່ຖືກເຊື້ອໄວຣັສນີ້ເຂົ້າສູ່ຮ່າງກາຍ ກໍຈະມີຕັ້ງແຕ່ເປັນໄຂ້ທຳມະດາບໍ່ຫນັກຫນາຫຍັງ ໄປຈົນຮອດອາການຮຸນແຮງເຖິງຂັ້ນເລືອດອອກ ແລະຮ້າຍແຮງກວ່ານັ້ນ (ພົບຫນ້ອຍ) ແມ່ນມີອາການຊ໋ອກ ແລະເຖິງຂັ້ນເສຍຊີວິດໄດ້.
ຈຸດສຳຄັນຄືມັນມີເຖິງ 4 ສາຍພັນ ສະນັ້ນຄົນທີ່ເຄີຍເປັນໄຂ້ເລືອດອອກຄັ້ງທຳອິດແລ້ວ ມັກຈະເປັນອີກຄັ້ງທີ 2 ເຊິ່ງໃນຄັ້ງທີ່ສອງນີ້ເອງ ມີໂອກາດ
ທີ່ອາການຈະຫນັກກວ່າເກົ່າ ເນື່ອງຈາກການທີ່ເປັນຄັ້ງທີສອງສະແດງເຖິງວ່າເປັນເຊື້ອເດັງກີສາຍພັນອື່ນ ເຮັດໃຫ້ພູມຕ້ານທານບໍ່ຮູ້ຈັກ ແລະຄຶດ
ວ່າເປັນແບບເກົ່າ ຈຶ່ງຕ້ານບໍ່ຖືກວິທີ ເຮັດໃຫ້ອາການຫນັກກວ່າເກົ່າ.

ໄຂ້ເລືອດອອກຖືເປັນພະຍາດຊະນິດນຶ່ງທີ່ຂ້າປະຊາກອນທົ່ວໂລກເປັນ ຈຳນວນຫລາຍ ໂດຍສະເພາະແຕ່ລະປີໃນບ້ານເຮົາ ກໍມີຜູ່ເສຍຊີວິດຫລາຍ
ສິບຄົນ.ຟັງເບິ່ງແລ້ວກໍເປັນຕາຢ້ານ ແຕ່ກໍຍັງມີດີຢູ່ບ່ອນນຶ່ງ ເນື່ອງຈາກໄຂ້ເລືອດອອກມັກຈະເປັນຄັ້ງທຳອິດ ແລະເປັນຊ້ຳຄັ້ງທີສອງ ເມື່ອເປັນ
ເຖິງສອງຄັ້ງ ໂອກາດທີ່ຮ່າງກາຍຈະລຶ້ງເຄີຍກັບເຊື້ອດັ່ງກ່າວກໍມີສູງ ມັນຈຶ່ງສາມາດສ້າງພູມຕ້ານທານພະຍາດເດັງກີໄດ້ ຈົນເຖິງຂັ້ນສາມາດ
ປ້ອງກັນບໍ່ໃຫ້ຕິດເຊື້ອໄດ້ອີກ ສະນັ້ນຈຶ່ງມັກພົບວ່າຄົນສ່ວນໃຫຍ່ເປັນໄຂ້ເລືອດອອກບໍ່ເກີນສອງຄັ້ງ

admin ກໍເປັນສອງຄັ້ງ ຄັ້ງທຳອິດເປັນຕອນຮຽນຢູ່ ປ5 ຄັ້ງທີສອງເປັນຕອນຮຽນຢູ່ ມ5 ແລະກໍບໍ່ເປັນອີກເລີຍຕັ້ງແຕ່ນັ້ນມາ.

 

ຈະຮູ້ໄດ້ແນວໃດວ່າໃຜເປັນໄຂ້ເລືອດອອກ
3
ຄຳຖາມສຳຄັນທີ່ສຸດກໍແມ່ນ ຈະຮູ້ໄດ້ແນວໃດເຮົາຫລືໃຜເປັນໄຂ້ເລືອດອອກ ຈຸດນີ້ຖືວ່າເປັນສິ່ງສຳຄັນ ເນື່ອງຈາກຄວາມລຶ້ງເຄີຍຂອງຄົ
ລາວສ່ວນໃຫຍ່ ເວລາບໍ່ສະບາຍກໍໄປຮ້ານຂາຍຢາຊື້ຢາກິນເອງ ເຮັດໃຫ້ຂາດການກວດຈາກແພດຫມໍຢ່າງຖືກຕ້ອງ ເຊິ່ງນີ້ກໍເປັນສາ
ເຫດນຶ່ງທີ່ເຮັດໃຫ້ມີຄົນເສຍຊີວິດ ຈາກການເປັນໄຂ້ເລືອດອອກ ເນື່ອງຈາກຄຶດແຕ່ວ່າເປັນໄຂ້ທຳມະດາບໍ່ໄປຫາຫມໍ ສະນັ້ນເຮົາມາສັງ
ເກດຕົນເອງ ແລະຄົນອ້ອມຂ້າງວ່າຍາມເປັນໄຂ້ມີອາການດັ່ງນີ້ຫລືບໍ່ ຖ້າມີຄວນໄປໂຮງຫມໍໂດຍດ່ວນ.

1. ມີອາການໄຂ້ຂຶ້ນສູງເປັນເວລາ 2-7 ມື້. ໃນຄວາມເປັນຈິງຖ້າເບິ່ງອາການຮອດ 7 ມື້ນັ້ນ ມີຄວາມເປັນໄປໄດ້ສູງທີ່ມື້ທີ 7 ຫລື 8 ອາດຈະ
ຊ໋ອກແລະເສຍຊີວິດໄດ້ ທາງທີ່ດີກໍຄືຖ້າໄຂ້ສູງ 2-3 ມື້ຄວນໄປຫາຫມໍດີກວ່າ.

2. ມີອາການເຈັບຫົວ ເມື່ອຍຕົນເມື່ອຍໂຕ

3. ຫນ້າແດງ ແລະເຫັນຈຸດແດງໆຂຶ້ນຕາມໂຕ ຕາມແຂນ ຕາມຂາ.

4. ຖ້າມີໄຂ້ຮອດ 3 ມື້ ແຕ່ຍັງບໍ່ໄປຫາຫມໍ ຈະສັງເກດວ່າເຖິງໄຂ້ຈະລົດລົງແຕ່ຍັງມີອາການເມື່ອຍ ອ່ອນເພຍ ບໍ່ຢາກອາຫານ ແລະປວດຮາກ.

ຖ້າສັງເກດວ່າມີອາການເຫລົ່ານີ້ ຄວນຮີບໄປຫາຫມໍໂດຍທັນທີ ເພາະຖ້າປ່ອຍອີກຕໍ່ໄປ ອາການອາດຫນັກຈົນເຖິງຂັ້ນຊ໋ອກ ແລະອາດເສຍ
ຊີວິດພາຍຫລັງຊ໋ອກ 12-24 ຊົ່ວໂມງ.

ສະຫລຸບເປັນໄຂ້ບໍ່ສະບາຍຍາມຝົນແບບນີ້ ໄປຫາຫມໍດີກວ່າ.

 

ເມື່ອຮູ້ວ່າເປັນໄຂ້ເລືອດອອກ ຄວນເຮັດແນວໃດ?4
ເມື່ອສົງໄສ ຫລືແນ່ໃຈວ່າເປັນໄຂ້ເລືອດອອກ ເບື້ອງຕົ້ນຄວນປະຕິບັດດັ່ງນີ້:

1. ດື່ມນ້ຳຫມາກໄມ້ (ສ່ວນໃຫຍ່ເຫັນດື່ມນ້່ຳຫມາກພ້າວ ຄວາມຈິງນ້ຳຫມາກຫຍັງກໍໄດ້ ເພາະໃນນ້ຳຫມາກໄມ້ມີແຮ່ທາດຫລາຍ) ຫລືນ້ຳເກືອ
ແຮ່ (ນ້ຳໂອລາລິດ) ເພື່ອບໍ່ໃຫ້ຮ່າງກາຍອ່ອນເພຍ

2. ຖ້າໄຂ້ຂຶ້ນສູງ ຄວນໃຊ້ຜ້າຈຸ່ມນ້ຳມາເຊັດໂຕເພື່ອລົດໄຂ້

3. ຫາກຈຳເປັນຕ້ອງກິນຢາລົດໄຂ້ ຄວນກິນຕາມແພດສັ່ງ ໂດຍໃຫ້ໃຊ້ຢາປາຣາເຊຕາໂມນ ກິນຫ່າງກັນຢ່າງນ້ອຍ 4 ຊົ່ວໂມງ ຖ້າໄຂ້ລົດຕ່ຳກວ່າ
39 ອົງສາ ກໍບໍ່ຄວນກິນຕື່ມ. (ສຳຄັນຄືຫ້າມໃຊ້ຢາລົດໄຂ້ຊະນິດອື່ນເດັດຂາດ ເຊັ່ນ ແອັສໄພຣິນ ເພາະອາດຈະເຮັດໃຫ້ເລືອດອອກງ່າຍ ແລະເປັນ
ອັນຕະລາຍຕໍ່ຕັບໄດ້).

4. ຄວນງົດອາຫານທີ່ມີສີແດງ, ສີດຳ ເນື່ອງຈາກຫາຮາກອອກມາອາຫານສີແບບນີ້ຈະເຮັດໃຫ້ເຂົ້າໃຈຜິດວ່າເປັນເລືອດໄດ້.

5. ພາໄປໂຮງຫມໍ ເພື່ອຕິດຕາມອາການ ແລະກວດເລືອດ (ກວດຄວາມເຂັ້ມຂຸ້ນຂອງເລືຶອດ) ເຊິ່ງຜົນການກວດເລືອດຈະບອກໄດ້ວ່າ ອາການຫນັກເຖິງຂັ້ນຕ້ອງນອນໂຮງຫມໍຫລືບໍ່

6. ຈຸດສຸດທ້າຍທີ່ຄວນສັງເກດຄື ເມື່ອອາການດີຂຶ້ນ ຫມາຍຄວາມໄຂ້ລົດລົງໃນລະດັບປົກກະຕິແລ້ວ ບາງຄົນກໍແຂງແຮງກິນດື່ມໄດ້ກໍຖືວ່າເຊົາ
ໄປ ແຕ່ໃນບາງຄົນເນື່ອງຈາກໄລຍະນີ້ເກັດເລືອດຈະຄ່ອຍໆປັບເຂົ້າສູ່ສະພາບປົກກະຕິ ເຊິ່ງໃຊ້ເວລາ 3-7 ມື້ ດັ່ງນັ້ນໃນໄລຍະທີ່ໄຂ້ເຊົ່າແລ້ວ ຮ່າງກາຍກໍຈະຍັງບໍ່ປົກກະຕິ ໃຫ້ສັງເກດວ່າຍັງມີອາການເມື່ອຍ ເຈັບຫົວຢູ່ບໍ່ ເພາະປົກກະຕິຖ້າໄຂ້ລົດອາການເຫລົ່ານີ້ຕ້ອງຫາຍໄປ ຖ້າຍັງມີສະ
ແດງວ່າອາດຈະອັນຕະລາຍໄດ້ ຮີບໄປໂຮງຫມໍໂດຍດ່ວນ.

ດີແທ້ກໍແມ່ນຟັງຄວາມຫມໍ ແລະປະຕິບັດຕາມດີທີ່ສຸດ

 

ການປ້ອງກັນໄຂ້ເລືອດອອກ

5

ການປ້ອງກັນໄຂ້ເລືອດອອກເປັນເລື່ອງທີ່ງ່າຍໃຜກໍເວົ້າໄດ້ ແຕ່ເຮັດຍາກ ຫລັກໆກໍມີສອງວິທີຄື:
1. ບໍ່ໃຫ້ມີຍຸງລາຍ ຖ້າບໍ່ມີຍຸງລາຍກໍບໍ່ມີໄຂ້ເລືອດອອກ
2. ຢ່າໃຫ້ຍຸງລາຍກັດ ເວົ້າງ່າຍອີ່ຫລີ່ ແຕ່ຈະເຮັດແນວໃດ???

+ ວິທີກຳຈັດຍຸງລາຍ
- ປິດຝາພາຊະນະຕ່າງໆທີ່ມີນ້ຳຢູ່ໃຫ້ແຈບບໍ່ໃຫ້ຍຸງໄປໄຂ່ໄດ້.
- ປ່ຽນນ້ຳໂຖດອກໄມ້ທຸກອາທິດ
- ໃສ່ປາທີ່ກິນຫນອນນ້ຳເຊັ່ນ ປາຫາງນົກຍຸງ ລົງໃນບ່ອນທີ່ມີນ້ຳຂັງທີ່ບໍ່ສາມາດເທຖິ້ມຫລືອັດຝາໃຫ້ແຈບໄດ້.
- ເກັບມ້ຽນ ຫລືທຳລາຍຂີ້ເຫຍື້ອ, ພາຊະນະ, ສິ່ງເສດເຫລືອຕ່າງໆທີ່ມີນ້ຳຂັງ
- ຄວ້ຳພາຊະນະທີ່ບໍ່ໄດ້ໃຊ້ ເພື່ອບໍ່ໃຫ້ມີນ້ຳຂັງ
- ໃສ່ເກືອ, ນ້ຳສົມສາຍຊູ ຫລືແຟັບ ໃສ່ບ່ອນທີ່ມີນ້ຳຂັງ ທີ່ບໍ່ສາມາດໃສ່ປາ ຫລືອັດຝາໄວ້ໄດ້

+ ຫລີກລ່ຽງບໍ່ໃຫ້ຍຸງລາຍກັດ
- ຈຸດພິເສດຂອງຍຸງລາຍແມ່ນຫາກິນຍາມກາງເວັນ
- ຫລີກລ່ຽງກິດຈະກຳທີ່ມີຄວາມສ່ຽງຈະຖືກຍຸງລາຍກັດ ໃນໄລຍະເວລາກາງເວັນ ໂດຍສະເພາະຫົວຄ່ຳຫລືຄ້າຍແລງ ບໍ່ຄວນຢູ່ນອກເຮືອນ ຫລືບ່ອນທີ່ບໍ່ມີແນວປ້ອງກັນຍຸ
- ໃຊ້ຢາທາກັນຍຸງຕ່າງໆປ້ອງກັນໄວ້ເວລາຕ້ອງອອກນອກເຮືອນ.

ປະກອບສ່ວນຊ່ອຍກັນ ເພື່ອຫລີກລ່ຽງບໍ່ໃຫ້ຍຸງລາຍແຜ່ຂະຫຍາຍໄດ້ຫລາຍ ກໍຈະລົດຈຳນວນຜູ່ຕິດເຊື້ອລົງໄດ້.

 

ຍຸງລາຍແຜ່ເຊື້ອໄດ້ແນວໃດ?

6

ເຄີຍສົງໄສບໍ່ ວ່າເປັນຫຍັງຍຸງລາຍຈຶ່ງແຜ່ເຊື້ອໄຂ້ເລືອດອອກໄດ້ ທັງໆທີ່ພະຍາດເດັງກີ ກໍບໍ່ໄດ້ເກີດຢູ່ຍຸງ ແຕ່ເກີດຢູ່ຄົນແລ້ວຍຸງໄປກັດຄົນມີເຊື້ອໄປແຜ່ສູ່ຄົນອື່ນຕໍ່ ຟັງແລ້ວກໍເປັນຕາຢ້ານເນາະ ຄັນຊັ້ນເວລາຍຸງໄປກັດຄົນເປັນເອດສ໌ ແລ້ວມາກັດເຮົາເຮົາກໍຈະບໍ່ຕິດເອດສ໌ບໍ້???

ສຳລັບໄຂ້ເລືອດອອກແມ່ນແຜ່ຜ່ານຍຸງລາຍ ສ່ວນຍຸງຊະນິດອື່ນໆກໍຕ່າງກັນອອກໄປເຊັ່ນຍຸງກົ້ນຊີ້ ກໍເປັນພາຫະຂອງໄຂ້ມາລາເຣຍ ໃນກໍລະນີ
ໄຂ້ເລືອດອອກນີ້ ກໍຍ້ອນວ່າເຊື້ອເດັງກີ ສາມາດຟັກໂຕໃນຍຸງລາຍໄດ້ ເມື່ອຍຸງລາຍໄປກັດຫລືໄດ້ຮັບເຊື້ອເດັງກີມາ ເຊື້ອຈະຟັກໂຕໃນຍຸງລາຍ ແລະຕິດຢູ່ໃນໂຕຍຸງລາຍຈົນມັນຕາຍ (ອາຍຸຍຸງລາຍປະມານ 1-2 ເດືອນ).

ຍຸງລາຍທີ່ເປັນພາຫະນຳເຊື້ອ ແມ່ນຍຸງໂຕແມ່ ເນື່ອງຈາກມີແຕ່ຍຸງໂຕແມ່ທີ່ມາກິນເລືອດຄົນ ສ່ວນຍຸງໂຕຜູ້ມັນໄປດູດນ້ຳຫວານດອກໄມ້ພຸ້ນ (ເຄີຍມີຄົນເວົ້າຕະຫລົກວ່າ ເວລາສິຕົບຍຸງໃຫ້ເບິ່ງກ່ອນວ່າເປັນໂຕແມ່ຫລືໂຕຜູ້ ຖ້າເປັນໂຕຜູ້ຢ່າໄປຕົບມັນ ເພາະມັນບໍ່ກັດເຮົາວ່າຊັ້ນ XD)

ຖ້າເວົ້າເຖິງການຕິດເຊື້ອຜ່ານຍຸງ ຄຶດວ່າຫລາຍຄົນຄົງຄຶດພາບວ່າຍຸງໄປກິນເລືອດຄົນເປັນໄຂ້ເລືອດອອກ ແລ້ວມັນດູດເລືອດເຮົາຕໍ່ ເລືອດ
ຂອງຄົນທີ່ເປັນໄຂ້ເລືອດອອກຈະມາເຂົ້າສູ່ຮ່າງກາຍເຮົາແລ້ວເຮົາກໍຕິດເຊື້ອນັ້ນບໍ່ແມ່ນຄວາມຈິງ ຄວາມຈິງຄືເລືອດທີ່ຍຸງດູດໄປກໍຢູ່ສ່ວນເລືອດ ເວລາຍຸງໄປກັດຄົນອື່ນຕໍ່ ມັນຈະປ່ອຍນ້ຳລາຍມາສູ່ຄົນທີ່ມັນກັດ ສະນັ້ນເຊື້ອຈຶ່ງມາກັບນ້ຳລາຍຂອງຍຸງ ເນື່ອງຈາກເຊື້ອຝັກໂຕໃນຍຸງຢູ່ແລ້ວ.

ໃນກໍລະນີໂຣກເອດສ໌ ແມ່ນຍຸງບໍ່ສາມາດເປັນພາຫະໄດ້ ຍ້ອນວ່າເຊື້ອເອດສ໌ ບໍ່ສາມາດຟັກໂຕໃນຍຸງໄດ້ ເຂົ້າຍຸງໄປມັນກໍຕາຍ ແລະເຊື້ອເອດສ໌
ຈະຕິດສູ່ຄົນອື່ນໄດ້ ຕ້ອງມີປະລິມານທີ່ຫລາຍໃນລະດັບນຶ່ງ ເຊິ່ງເລືອດທີ່ຍຸງໂຕນຶ່ງດູດໄດ້ນັ້ນມີບໍ່ຫລາຍພໍທີ່ເຊື້ອຈະໄປຂະຫຍາຍໄດ້. ນັກວິທະຍາສາດໄດ້ເຮັດການວິໄຈແລ້ວວ່າ ໂອກາດທີ່ຍຸງໂຕນຶ່ງຈະດູດເລືອດທີ່ມີເຊື້ອເອດສ໌ ແລ້ວມີເຊື້ອເອດສ໌ຕິດໄປນຳໄດ້ ແມ່ນນຶ່ງໃນສິບລ້ານ ແລະບໍ່ແມ່ນວ່າເລືອດນັ້ນຈະຕິດສູ່ຄົນໄດ້ອີກ ສະນັ້ນຈຶ່ງຫາຍຫ່ວງເຮົາບໍ່ມີທາງຕິດເອດສ໌ຍ້ອນຍຸງກັດແນ່ນອນ.

 

ຂອບໃຈຂໍ້ມູນຈາກ Page “ວິທະຍາສາດ”  www.facebook.com/laosci

ສະແດງຄວາມຄິດເຫັນ