images (1)

ກລູຕາ ຫຼື ກລູຕາໄທໂອນ ຊື່ນີ້ເປັນຊື່ທີ່ກຳລັງ​ໄດ້ຮັບຄວາມນິຍົມ​ຫຼາຍໃນໂລກອອນລາຍ ໂດຍສະເພາະ​ໃນສາຍຂອງ​ຄວາມສວຍຄວາມງາມ ເນື່ອງຈາກເຂົາ​ນຳໃຊ້ເຂົ້າໃນ​ຜະລິດຕະພັນເສີມ​ຄວາມງາມຕ່າງໆ ບໍ່ວ່າຈະເປັນຢາ, ອາຫານເສີມ, ເຄື່ອງສຳອາງຫຼາກຫຼາຍ​ຊະນິດທີ່ເຮັດ​ໃຫ້ຜິວຂາວງາມ​ເປັ່ງປັ່ງມີນ້ຳມີນວນ ເຊິ່ງເປັນ​ຄຸນລັກສະນະ​ຂອງຜິວທີ່ຜູ່ຍິງ​ເກືອບຈະທຸກ​ຄົນຕ້ອງການ ເຮັດໃຫ້ຫຼາຍຄົນ​ທີ່ໄດ້ເຫັນ ໄດ້ຍິນອົດໃຈ​ທີ່ຈະຢາກງາມ​ຕາມກະແສ​ບໍ່ໄດ້ ເຊິ່ງຜູ່ຂຽນເອງ​ກໍເປັນນຶ່ງໃນນັ້ນ ແຕ່ດ້ວຍຄວາມຢ້ານ ບວກກັບຄວາມງົກຂອງຕົນເອງ(ເພາະລາຄາມັນສູງອີ່ຫຼີ) ກໍເລິຍບໍ່ກ້າທີ່ຈະຕັດສິນໃຈຈົກກະເປົາໃນທັນທີທັນໃດ ມັນກໍຕ້ອງມີການຫາຂໍ້ມູນຢ່າງລະອຽດກ່ອນວ່າມັນຈະເຮັດໃຫ້ງາມແທ້ ຫຼື ງາມທຽມສາກ່ອນ,  ວ່າແລ້ວກໍມາຮູ້ນຳກັນວ່າມັນຈະງາມແທ້ ຫຼື ງາມທຽມ.

ທຳອິດກໍຕ້ອງມາເຮັດຄວາມເຂົ້້າໃຈກັນກ່ອນວ່າ ກລູຕ້າໄທໂອນ (Glutathione) ແມ່ນ ໂປຣຕີນຂະໜາດນ້ອຍທີ່ສຳຄັນຕໍ່ຮ່າງກາຍຊະນິດນຶ່ງ ໂດຍຮ່າງກາຍສາມາດສ້າງຂຶ້ນໄດ້ເອງຈາກການໄດ້ຮັບອາຫານປະເພດໂປຣຕີນຈຳພວກໄຂ່ ແລະ ນົມ ຮວມໄປເຖິງຜັກໝາກໄມ້ຈຳພວກໜໍ່ໄມ້​ຝ​ຣັ່ງ, ອະໂວຄາໂດ ແລະ ຖົ່ວ ເຊິ່ງຮ່າງກາຍຈະເກັບກລູຕ້າທີ່ສ້າງຂຶ້ນໄວ້ຢູ່ຕັບ.

ກລູຕາໄທໂອນປະກອບໄປດ້ວຍກົດອະມີໂນ 3 ຊະນິດຄື: cysteine, glutamic acid, glycine ທີ່ສາມາດພົບໄດ້ໃນຈຸລັງຂອງຮ່າງກາຍ, ມີບົດບາດສຳຄັນໃນການຊ່ວຍຕໍ່ຕ້ານອະນຸມູນອິດສະຫຼະ, ປ້ອງກັນການເຊື່ອມສະພາບຂອງຈຸລັງ, ຊ່ວຍກະຕຸ້ນລະບົບພູມຄຸ້ມກັນຂອງຮ່າງກາຍ ແຖມຍັງຊ່ວຍຕັບຂັບສານພິດອອກຈາກຮ່າງກາຍອີກດ້ວຍ ແລະ ດ້ວຍຄວາມສັບພະຄຸນທີ່ກ່າວມານັ້ນ ຈຶ່ງໄດ້ມີການສຶກສາກລູຕ້າໄທໂອນ ແລະ ນຳເອົາກລູຕ້າໄທໂອນມາຊ່ວຍໃນການປິ່ນປົວຄົນເຈັບທີ່ມີບັນຫາທາງດ້ານປະສາດ ເຊັ່ນ: ພາຄິນສັນ, ຄວາມຈຳເຊື່ອມ, ໂອທິດຕິກ ແລະ ຄົນເຈັບທີ່ມີບັນຫາເລື່ອງຕັບເປັນຕົ້ນ ແຕ່ມັນຍັງເປັນພຽງຂັ້ນຕອນຂອງການສຶກສາທົດລອງ ບໍ່ທັນມີການຮັບຮອງຢ່າງເປັນທາງການ, ນອກນັ້ນ ກໍຍັງມີການນຳໄປໃຊ້ກັບຜິວ ເພື່ອເຮັດໃຫ້ຜິວຂາວຂຶ້ນ ໂດຍອາໄສກົນໄກການເຮັດວຽກທີ່ມີຄຸນສົມບັດໄປກົດການສ້າງເມັດສີຂອງຜິວໃຫ້ຜິວຂາວຂຶ້ນ ຂໍອະທິບາຍໜ້ອຍນຶ່ງກ່ຽວກັບຂະບວນການເຮັດວຽກຂອງກລູຕາຈັກໜ້ອຍ ເພື່ອໃຫ້ໄດ້ເຫັນພາບໄປນຳກັນ.ดาวน์โหลด

ອັນນີ້ແມ່ນຮູບຂອງຊັ້ນຜິວໜັງຂອງຄົນເຮົາ

ຮ່າງກາຍຂອງຄົນເຮົາມີຈຸລັງສ້າງເມັດສີນຶ່ງທີ່ຊື່ວ່າ Melanocyte (ຕາມຮູບເລີຍ) ຜະລິດເມັດສີເມລານິນ (Melanin)  2 ຊະນິດຄື: ຄົນທີ່ມີສີຜິວອອກຄໍ້າແບບຄົນອາຊີ ຈະມີເມັດສີຂະໜາດໃຫຍ່ ເອີ້ນວ່າ Eumelanin, ສ່ວນຄົນທີ່ມີຜິວຂາວແບບຄົນຝ​ຣັ່ງເອີລົບ ຈະມີເມັດສີຂະໜາດນ້ອຍ ເອີ້ນວ່າ: Pheomelanin  ເມື່ອຮ່າງກາຍໄດ້ຮັບສານກລູຕາເຂົ້າໄປໃນປະລິມານຫຼາຍ ກໍຈະໄປກົດການສ້າງເມັດສີ Eumelanin ໃຫ້ຫຼຸດລົງ ແລະ ໄປເພີ່ມການສ້າງເມັດສີ Pheomelanin ໃຫ້ຫຼາຍຂຶ້ນພຽງຊົ່ວຄາວ ມັນຈຶ່ງເຮັດໃຫ້ຜິວຂາວງາມຂຶ້ນ ແລະ ເນື່ອງຈາກກລູຕາ ບໍ່ສາມາດປັບປ່ຽນໂຄງສ້າງທາງກຳມະພັນຂອງຈຸລັງສ້າງເມັດສີໄດ້ ເມື່ອຮ່າງກາຍບໍ່ໄດ້ຮັບກລູຕາເຂົ້າໄປ ຜິວເຮົາກໍຈະກັບໄປດຳຄໍ້າຄືເກົ່າ.

ໂດຍສັບພະຄຸນທີ່ເຮັດໃຫ້ຜິວຂາວງາມຂຶ້ນນັ້ນ ຍັງບໍ່ທັນມີຂໍ້ມູນທາງວິທະຍາສາດທີ່ສາມາດເຊື່ອຖືໄດ້ເທື່ອ ແຖມຍັງບໍ່ໄດ້ຖືກຮັບຮອງຈາກ ອົງການອາຫານ ແລະ ຢາ ໂດຍສະເພາະອົງການອາຫານ ແລະ ຢາລະດັບໂລກຢ່າງສະຫະລັດອາເມລິກາ (ຖ້າຖືກຮັບຮອງຈາກອົງການຂອງປະເທດນີ້ ແມ່ນຈະໄດ້ໃຈຜູ້ບໍລິໂພກໄປເຕັມໆ ແຕ່ຖ້າບໍ່ຖືກອົງກອນນີ້ຮັບຮອງເອົາ ແມ່ນຄວາມເຊື່ອຖືຈາກຜູ້ບໍລິໂພກ​ຢາກວ່າຈະຕິດລົບເລີຍ).

ສຳລັບຜະລິດຕະພັນກລູຕາໄທໂອນທັງຫຼາຍ ທີ່ມີຂາຍກັນເຕັມທ້ອງຕະຫຼາດ ແລະ ໂລກອອນ​ລາຍຕ່າງໆ ທີ່ມາໃນຮູບແບບຂອງຢາເມັດ ແລະ ຜົງລະລາຍນ້ຳ ທີ່ກິນເຂົ້າໄປນັ້ນ ອາດຈະລະລາຍຫາຍໄປກັບຂະບວນການຍ່ອຍອາຫານຂອງຮ່າງກາຍ ເຮັດໃຫ້ຮ່າງກາຍບໍ່ໄດ້ດູດຊຶມເອົາສານກລູຕ້າຕາມປະລິມານທີ່ກິນເຂົ້າໄປ ຫຼື ບາງທີກໍບໍ່ໄດ້ຮັບເລີຍ (ເວົ້າໄດ້ເລີຍວ່າ ພວກທີ່ກິນເຂົ້າໄປແມ່ນບໍ່ໄດ້ຮັບຜົນດີ ແຖມຍັງຈູດເງິນຫຼິ້ນລ້າໆ). ສະນັ້ນ, ຫຼາຍໆຄົນຈຶ່ງນຳໃຊ້ວິທີການສີດສານກລູຕ້າເຂົ້າໄປໃນເສັ້ນເລືອດດຳ ເພາະມັນໃຫ້ຜົນຮັບໃນການເຮັດໃຫ້ຜິວຂາວໄວກວ່າການກິນຫຼາຍເທົ່າ

Quote_medicine… ແຕ້ ແຕ໊ ແຕ໋ ແຕ່ວ່າ (ປະເດັນຂອງມັນຢູ່ບ່ອນນີ້ລະ) ການສີດສານກລູຕາເຂົ້າໃນຮ່າງກາຍຜ່ານກ້າມຊີ້ນ ຫຼື ຫຼອດເລືອດດຳເພື່ອເຮັດໃຫ້ຜິວຂາວຂຶ້ນນັ້ນ ເປັນພຽງຜົນຂ້າງຄຽງທີ່ເກີດຂຶ້ນພຽງຊົ່ວຄັ້ງຊົ່ວຄາວເທົ່ານັ້ນ ຖ້າຫາກຢາກໃຫ້ຜົນຂອງຄວາມຂາວງາມນັ້ນຄົງຢູ່ຕະຫຼອດ ກໍຕ້ອງ​ໄດ້ສີດສານ​ເຂົ້າໄປ​ເປັນປະຈຳ ເຊິ່ງມັນ​ເຮັດໃຫ້ມີ​ການສະສົມ​ກລູຕາໃນຮ່າງກາຍ​ຫຼາຍຂຶ້ນ ແລະ ມັນອາດກໍ່ໃຫ້ເກີດມີອັນຕະລາຍໃນ​ໄລຍະຍາວທີ່ອາດພັດທະນາໄປ​ເປັນມະເຮັງໃນຂັ້ນຕໍ່​ໄປໄດ້ (ຢ່າລືມວ່າ​ກລູຕາ​ທີ່ສີດ​ໃຊ້​ເຂົ້າໃນຮ່າງ​ກາຍ​ເປັນການສັງເຄາະ​​ດ້ວຍຂະບວນ​ການທາງເຄມີ ເຊິ່ງມັນ​ກໍເທົ່າກັບ​ເປັນການນຳ​ເອົາສານເຄມີ​ເຂົ້າໄປສະສົມ​ໃນຮ່າງກາຍ​ຂອງເຮົາອີກທາງນຶ່ງ)  ແລະ ອີກຢ່າງ ການທີ່ຈະສີດ​ສານກລູຕາ​ເຂົ້າໃນຮ່າງກາຍ ຕ້ອງໄດ້ຮັບການສີດ​ຈາກຜູ່ທີ່ມີຄວາມຊ່ຽວຊານ​ສະເພາະທາງເທົ່ານັ້ນ ເພື່ອປ້ອງກັນບໍ່ໃຫ້ເກີດມີບັນຫາຕາມມາພາຍຫຼັງຈາກທີ່ສີດກລູຕ້າເຂົ້າໃນຮ່າງກາຍ ເຊິ່ງບັນຫາທີ່ເກີດຂຶ້ນມີຜົນກະທົບຂັ້ນ​ຮຸນແຮງຈົນເຖິງຂັ້ນເສຍຊີວິດໄດ້ ແລະ ຄົນທີ່ມີອາການແພ້ອາຫານປະເພດໂປຣຕີນ ຢ່າງພວກໄຂ່, ນົມ ຫຼື ແປ້ງສາລີເປັນຕົ້ນ ບໍ່ຄວນຮັບສານກລູຕ້າເຂົ້າສູ່ຮ່າງກາຍ ເພາະກລູຕາກໍເປັນໂປຣຕີນຊະນິດ​ນຶ່ງຄືກັນ ລວມໄປເຖິງເດັກນ້ອຍໆ ແລະ ຜູ່ຍິງຖືພາ ກໍຄວນຫຼີກລ້ຽງການນຳໃຊ້ສານກລູຕ້າຖ້າບໍ່ຈຳເປັນ.

ຍັງມີອີກສິ່ງ​ນຶ່ງທີ່ຜູ່ຂຽນຢາກໃຫ້ຜູ່ອ່ານທຸກຄົນຄຳນຶງໄວ້ສະເໝີວ່າ: “ບໍ່ມີຢາຊະນິດໃດທີ່ປອດໄພ 100%” ສະນັ້ນ, ກ່ອນທີ່ຈະນຳຢາຊະນິດໃດເຂົ້າໄປໃນຮ່າງກາຍ ກໍຄວນ​ມີການສຶກສາຢ່າງລະອຽດຮອບຄອບ ບໍ່ຄວນໄປເຊື່ອຄຳໂຄສະນາຈົນເກີນໄປ ເພາະຊີວິດເຮົາມີຊີວິດດຽວ ບໍ່ມີໃຜມາຮັກສາຊີວິດເຮົາໄປໄດ້ດີກວ່າໂຕເຮົາເອງ.

ສ່ວນອັນນີ້ເປັນລິ້ງທີ່ເພິ່ນອະທິບາຍກ່ຽວກັບກລູຕາຈາກປະສົບການໂດຍກົງ ລອງເອົາໄປພິຈາລະນະເບິ່ງອີກທາງໄດ້:

http://www.dek-d.com/board/view/1397392/

ໂດຍ: ພອນສະຖຽນ