image
ຕອນນີ້ທົ່ວໂລກກຳລັງວິຕົກກັງວັນກັບພະຍາດເມີ ພະຍາດໃໝ່ທີ່ກຳລັງລະບາດໜັກ ແລະ ມີແນວໂນ້ມວ່າຈະມີຜູ່ຕິດເຊື້ອເພີ່ມຂຶ້ນອີກຢ່າງຫຼວງຫຼາຍ ໂດຍພະຍາດນີ້ແມ່ນເກີດຈາກໄວຣັສທີ່ຊື່ວ່າ ເມີ (MERS-CoV) ຊື່ເຕັມໆແມ່ນ Middle East Respiratory Syndrome Coronavirus ຫຼືເຊື້ອໄວຣັສໂຄໂຣນາສາຍພັນຕາເວັນອອກກາງ ເປັນເຊື້ອໄວຣັສຊະນິດ Corona Virus ຢູ່ໃນກຸ່ມ Single-Stranded RNA  ຫຼືວ່າງ່າຍໆກໍ່ແມ່ນເຊື້ອພະຍາດໄຂ້ຫວັດນັ້ນລະ

ຕົ້ນກຳເນີດຂອງ MERS-CoV

ໄວຣັສຊະນິດນີ້ມີຕົ້ນກຳເນີດມາຈາກປະເທດຊາອຸດີອາຣາເບຍ (ປະເທດໃນແຖບຕາເວັນອອກກາງ) ແຕ່ຍັງບໍ່ສາມາດລະບຸໄດ້ວ່າມີຕົ້ນກຳເນີດມາຈາກຄົນ ຫຼື ສັດ ຫຼື ເຊື້ອໃດ ແຕ່ມີຜົນງານການວິໄຈລະບຸໄວ້ວ່າ ອາດຈະມີແບ້ເປັນພາຫະນຳເຊື້ອ ແລະ ກໍເປັນເຊື້ອທີ່ໃກ້ຄຽງກັບໄວຣັສໃນເຈຍສາຍພັນນຶ່ງ.
ພົບຄົນເຈັບຄົນທຳອິດທີ່ເປັນພະຍາດນີ້ຢູ່ປະເທດຊາອຸດີອາຣາເບຍ ໃນປີ 2012 ເປັນຊາຍ ອາຍຸ 60 ປີ ໂດຍຄົນເຈັບມີອາການໜາວສັ່ນ ໄອ ຫາຍໃຈບໍ່ສະດວກ ປອດບວມ ຈົນໃນທີ່ສຸດກໍເສຍຊີວິດໃນ 2 ອາທິດຕໍ່ມາ ແຕ່ໃນເວລານັ້ນ ຍັງບໍ່ສາມາດໄດ້ວ່າເປັນພະຍາດຫຍັງ ແລະ ຕໍ່ມາອີກບໍ່ດົນກໍໄດ້ພົບຄົນເຈັບຄົນທີ 2 ເຊິ່ງເປັນຊາຍຊາວກາຕາ ອາຍຸ 49 ປີ ໂດຍມີອາການປອດບວມ ແລະ ໝາກໄຂ່ຫຼັງຊຸດໂຊມ ແຕ່ຄົນນີ້ແມ່ນສາມາດຮັກສາຊີວິດໄວ້ໄດ້. ຈາກການກວດສອບປະຫວັດຢ່າງລະອຽດພົບວ່າ ຊາຍຄົນນີ້ໄດ້ເດີນທາງໄປຊາອຸດິອາຣາເບຍ ແລະ ຈາກການກວດຮ່າງກາຍຂອງລາວຢ່າງລະອຽດ ກໍພົບວ່າ ເສມຫະຂອງລາວມີເຊື້ອທີ່ໃກ້ຄຽງກັບເສມຫະຂອງຄົນເຈັບຄົນທຳອິດເຖິງ 99,5% ແລະ ພະຍາດນີ້ກໍຖືກຳເນີດມາດ້ວຍຊື່ວ່າ ເມີ (MERS-CoV) ແລ້ວກໍເປັນທີ່ຮູ້ຈັກຂອງຄົນທົ່ວໂລກ ແຖມຍັງເຮັດໃຫ້ເຮົາວິຕົກກັງວົນໜັກອີກ.

ຫົນທາງການຕິດຕໍ່ຂອງ MERS-CoV

ໄວຣັສເມີ (MERS-CoV) ເປັນເຊື້ອທີ່ມີຄວາມທົນທານ ສາມາດທົນຕໍ່ສະພາບອາຮ້ອນໄດ້ສູງ ເຖິງ 50°C ເພາະມັນມີຖິ່ນກຳເນີດຢູ່ໃນດິນແດນທະເລຊາຍ ໂດຍອຸນຫະພູມທີ່ເຊື້ອສາມາດຂະຫຍາຍໂຕໄດ້ດີຢູ່ລະຫວ່າງ 25-35°C (ອຸນຫະພູມຮ່າງກາຍຂອງຄົນແມ່ນເຊື້ອນີ້ມັກສຸດ) ແລະ ຢູ່ໄດ້ດົນເຖິງ 2 ມື້ ເມື່ອເຂົ້າສູ່ຄົນຈະໃຊ້ເວລາຝັກໂຕປະມານ 14 ມື້. ເຊື້ອໄວຣັສນີ້ສາມາດຕິດຕໍ່ໄດ້ງ່າຍດາຍຈາກການສຳຜັດລະອອງນໍ້າລາຍ, ນໍ້າມູກ ແລະ ເສມຫະຂອງຜູ່ຕິດເຊື້ອໂດຍກົງ ຫຼືຈາກທີ່ເຂົາຈາມໃສ່ເຮົາໃນລັດສະໝີ 1 ແມັດ ແຕ່ເຊື້ອນີ້ບໍ່ໄດ້ລອຍຢູ່ໃນອາກາດ ຈຶ່ງບໍ່ສາມາດຕິດຕໍ່ທາງອາກາດ ແລະ ຖ້າເຊື້ອແຜ່ລາມເຂົ້າສູ່ປອດແລ້ວ ຈະມີໂອກາດທີ່ຈະເສຍຊີວິດສູງເຖິງ 36% ເຊິ່ງອາການຂອງພະຍາດນີ້ແມ່ນມີຄວາມຮຸນແຮງແຕກຕ່າງກັນ ຕັ້ງແຕ່ງຮຸນແຮງໜ້ອຍໄປຈົນຮຸນແຮງຫຼາຍ ແລະ ມີປະມານ 20% ທີ່ຈະບໍ່ສະແດງອາການເລີຍ.
ເມື່ອຕົ້ນເດືອນ ມິຖຸນາ 2015 ທີ່ຜ່ານມາ ອົງການອະນາໄມໂລກ (WHO) ກໍໄດ້ອອກມາຢືນຢັນວ່າ ມີຄົນເຈັບທີ່ຕິດເຊື້ອສະສົມປະມານ 1,200 ກໍລະນີ ແລະ ໃນຈຳນວນນີ້ ເສຍຊີວິດແລ້ວກວ່າ 400 ກໍລະນີ ແລະ ຕອນນີ້ກໍກຳລັງລະບາດໜັກໃນປະເທດເກົາຫຼີໃຕ້ ເຊິ່ງຄົນເຈັບຄົນທຳອິດທີ່ພົບໃນເກົາຫຼີໃຕ້ພົບວ່າ ເດີນທາງມາຈາກປະເທດໃນແຖບຕາເວັນອອກກາງ ແລະ ຈຳນວນຜູ່ຕິດເຊື້ອໃນເກົາຫຼີໃຕ້ແມ່ນຢູ່ໃນອັນດັບ 3 ຂອງໂລກ ຮອງຈາກປະເທດຊາອຸດິອາຣາເບຍ ແລະ ສະຫະລັດອາຣັບເອມິເລດ (UAE)

ອາການຂອງພະຍາດເມີ (MERS-CoV)

ຜູ່ທີ່ໄດ້ຮັບເຊື້ອພະຍາດນີ້ຈະມີອາການຄືກັບກັບທີ່ເປັນພະຍາດໃນລະບົບທາງເດີນຫາຍໃຈທົ່ວໄປ ຈະມີໄຂ້ສູງ ໄອ ຫາຍໃຈຫອບ ຫາຍໃຈຕິດຂັດ ຫາຍໃຈບໍ່ສະດວກ ຖ່າຍເປັນນໍ້າ, ຫາກເປັນໜັກຈະເສຍຊີວິດທັນທີພາຍໃນ 3-4 ອາທິດ ເຊິ່ງຄົນເຈັບເກືອບທັງໝົດ ປະມານ 96% ຈະມີພະຍາດປະຈຳໂຕຢ່າງໜ້ອຍ 1 ພະຍາດ ຫຼື ຫຼາຍກວ່າ ໂດຍພະຍາດສ່ວນຫຼາຍກໍແມ່ນ ເບົາຫວານ, ຄວາມດັນເລືອດ, ຫົວໃຈ ແລະ ໝາກໄຂ່ຫຼັງເປັນຕົ້ນ.

bx5pl3kcyaahqzj-jpg-large

ການປ້ອງກັນ ແລະ ຮັກສາ

ປັດຈຸບັນແມ່ນຍັງບໍ່ທັນມີຢາ ຫຼື ວັກຊີນປິ່ນປົວໂດຍກົງ ການປິ່ນປົວແມ່ນປິ່ນປົວໄປຕາມອາການຄືກັນກັບໄຂ້ຫວັດໃຫຍ່ທົ່ວໄປນັ້ນລະ ແຕ່ເຖິງແມ່ນວ່າມັນຈະບໍ່​ມີຢາປິ່ນປົວ ເຮົາກໍສາມາດປ້ອງກັນໂຕເຮົາເອງຈາກພະຍາດນີ້ໄດ້ ຫາກເຮົາຮັກສາສຸຂະອະນາໄມໃຫ້ສະອາດຢູ່ສະເໝີ ກິນອາຫານທີ່ຮ້ອນ, ໃຊ້ບ່ວງກາງ, ໃຊ້ຜ້າ ຫຼື ເຈ້ຍອະນາໄມປິດປາກເວລາທີ່ໄອ ຫຼື ຈາມ, ຫຼີກລ້ຽງການໄປສະຖານທີ່ທີ່ມີຜູ່ຄົນແອອັດ ຫຼືຫາກຕ້ອງໄປສະຖານທີ່ທີ່ມີຜູ່ຄົນຈຳນວນຫຼາຍ ກໍຄວນໃສ່ໜ້າກາກອະນາໄມປິດປາກປິດດັງ, ຮັກສາສຸຂະພາບໃຫ້ແຂງແຮງ, ຫາກຮູ້ສຶກບໍ່ສະບາຍ ຫຼື ເປັນໄຂ້ ເປັນຫວັດ ກໍຄວນຮີບຟ້າວໄປພົບແພດທັນທີ ແລະ ທີ່ສຳຄັນ ຜູ່ໃດທີ່ເດີນທາງໄປໃນພື້ນທີ່ທີ່ມີການຕິດຕໍ່ ແລະ ແຜ່ລະບາດຂອງພະຍາດນີ້ ຄວນຮີບຟ້າວໄປພົບແພດທັນທີທັນໃດເພື່ອກວດເບິ່ງວ່າຕິດເຊື້ອມາຫຼືບໍ່ ເພື່ອຈະໄດ້ສາມາດປິ່ນປົວໄດ້ທັນການ.

ຫາກໃຜຍັງມີຂໍ້ສົງ​ໄສຫຍັງ ກໍສາມາດຂໍຂໍ້ມູນລະອຽດກ່ຽວກັບພະຍາດນີ້ ລວມທັງພະຍາດຕິດຕໍ່ອື່ນໆອີກໄດ້ຈາກກົມຄວບຄຸມພະຍາດຕິດຕໍ່, ກະຊວງສາທາລະນະສຸກ ຫຼື ຈາກສາຍດ່ວນປ້ອງກັນພະຍາດຂອງກະຊວງວາທາລະນະສຸກ ໄດ້ທີ່ເບີ 1166

ຂອບໃຈຂໍ້ມູນຈາກ:

http://www.bpl.co.th

http://www.naewna.com

http://www.thairath.co.th

http://www.soccersuck.in.th