Freelancer ໃນ​ປັດ​ຈຸບັນ​ນີ້ບໍ່​ວ່າ​ໃຜໆ​ກໍ​ຕ້ອງ​ການ​ຄວາມ​ເປັນ​ອິ​ດ​ສະ​​ລະ​ພາບ​ໃນ​ການ​ໃຊ້​ຊີ​ວິດ ລວ​ມ​ໄປ​ເຖິງ​ການ​ເຮັ​ດ​ວຽກ​ງານ​ຕ່າງໆ, ຫຼາຍໆ​ຄົນ​ລ້ວນ​ແຕ່​ຢາກເຮັດ​ວຽກ​ໃນ​ສິ່ງ​ທີ່​ຕົນ​ເອງ​ມັກ ແລະ ສາ​ມາດ​ຕອບ​ສະ​ໜອງ​ຕໍ່​ປັດ​ໄຈ​ໃນ​ການ​ດຳ​ລົງ​ຊີ​ວິດ​ຕ່າງໆ​ຂອງ​ເຂົ​າ​ເອງ​ໄດ້. ໃນ​ບົດ​ຄວາມ​ນີ້​ຈຶ່ງ​ຢາກ​ນຳ​ສະ​ເໜີ​ກ່ຽວ​ກັບ​ ອາ​ຊີບ​ຮັບ​ຈ້າງ​ອິດ​ສະ​ລະ ຫຼື Freelancer ມາ​ໃຫ້​ທ່ານ​ຜູ່ອ່ານ​ໄດ້​ລອງ​ທຳ​ຄວາມ​ເຂົ້າ​ໃຈ​ກ່ຽວກ​ັບ​ສາຍ​ອາ​ຊີບ​ໃນ​ຮູບ​ແບບນີ້.

Freelance ແມ່ນ​ເປັນ​ການ​ການ​ເຮັດ​ວຽກ​ແບບ​ອິດ​ສະ​ລະ ທີ່​ຄົນ​ເຮັດ​ວຽກ​ສາ​ມາດ​ໄປ​ຮັບ​ວຽກ​ມາ​ຈາກ​ເຈົ້າ​ຂອງ​ໂຄງ​ການ ຫຼ​ື ຜູ່​ວ່າ​ຈ້າງ​ມາ​ເຮັດ​ເອງ​ໂດຍບໍ່​ຜ່ານ​ອົງ​ກອນ ຫຼື ບໍ​ລິ​ສັດ​ຕົ້ນ​ສັງ​ກັດ​ໃດ​ໆ. ທາງ​ດ້ານ​ຜົນ​ປະ​ໂຫຍດ​ຈຶ່ງ​ແມ່ນ​ຂຶ້ນ​ກັບ​ຕົວ​ຂອງ​ຜູ່​ຮັບ​ງານ ແລະ ຜູ່​ວ່າ​ຈ້າງ​ເປັນ​ຄົນ​ຕົກ​ລົງ​ກັນ​ເອງ.

Freelance-home

Freelance ໃນ​ປັດ​ຈຸ​ບັນ​ແມ່ນ​ກຳ​ລັງ​ໄດ້​ຮັບ​ຄວາມ​ນິ​ຍົມໃນ​ບັນ​ດາ​ກຸ່ມ​ຄົນ​ທີ່​ມັກ​ຄວາມ​ເປັນ​ອິດ​ສະ​ລະ​ໃນ​ການ​ເຮັດ​ວຽກ ເຊິ່ງກໍເໝາະ​ກັບຫຼາຍໆ​ສາຍ​ອາ​ຊີບບໍ່​ວ່າ​ຈະ​ເປັນ ນັກ​ອອກ​ແບບ, ຊ່າ​ງ​ຖ່າຍ​ຮູບ, ນັກ​ຂຽນ, ນັກ​ບັນ​ຊີ, ນັກ​ຂຽນ​ໂປ​ຣ​ແກ​ຣມ, ສິນ​ລະ​ປິນ ແລະ ໃນ​ເກືອບ​ທຸກໆ​ສາ​ຂາ​ອ​າ​ຊີບ.

​ການ​ເຮັ​ດອາ​ຊີບ​ແບບ Freelance ​ອາດ​ຈະ​ເປັນ​ສິ່ງ​ທີ່​ເອີ້ນ​ວ່າ​ໃຫ້​ອິດ​ສະ​ລະ​ພາບ​ແກ່​ຕົວ​ຜູ້​ປະ​ການ​ອາ​ຊີບນີ້ ແຕ່ກໍ​ເປັນ​ອາ​ຊີບ​ທີ່​ມີ​ຄວາມ​ສ່ຽງ​ຕໍ່​ການ​ຂາດ​ລາຍ​ໄດ້, ເຮົາ​ລອງ​ມາ​ປຽບ​ທຽບ​ຈ​ຸດ​ອ່ອນ ແລະ ຈຸດ​ດີ​ຂອງ​ອາ​ຊີບນີ້​ກັນ​ເບີ່ງ.

 

  • ​ຈ​ຸດ​ອ່ອນ

– ລາຍ​ໄດ້​ບໍ່​ຄ່ອຍ​ຄົງ​ທີ່
– ບໍ່​ມີ​ສະ​ວັດ​ດີ​ການ​ແບບ​ພະ​ນັກ​ງານ​ບໍ​ລິ​ສັດ
– ຮັບ​ຜິດ​ຊອບ​ວຽກ​ທຸກ​ຢ່າງ​ດ້​ວຍ​ຕົນເອງ
– ສ່ຽງ​ຕໍ່​ການ​ຂາດ​ເງິນ​ໝຸນ​ວຽນ
– ອາດ​ຈະ​ຖືກ​ໂກງ​ເງິນ​ຄ່າ​ຈ້າງ​ໄດ້​ງ່າຍ
– ສາ​ມາດ​ຖືກ​ຍາດ​ວຽກ​ໄດ້​ງ່າຍ
– ແລະ ບັນ​ຫາ​ອື່ນໆ ອີງ​ຕາມ​ສະ​ພາບ​ປັດ​ໄຈ​ພາຍນອກ ແລະ ພາຍ​ໃນ.

  • ຈຸດ​ດີ

– ສາ​ມາດ​ເຮັ​ດ​ວຽກ​ຕອນ​ໃດ, ສະ​ຖານ​ທີ່​ໃດ, ເວ​ລາ​ໃດ​ກໍ​ໄດ້ (ແຕ່​ຕ້ອງ​ສົ່ງ​ວຽກ​ໃຫ້​ທັນ​ຕາມ​ທີ່​ກຳ​ນົດ)
– ໄດ້​ເຮັດ​ວຽກ​ເປັນ​ນາຍ​ຕົວ​ເອງ (ເວັ້ນ​ແຕ່​ວ່າ​ເຈົ້າ​ຂອງວຽກ​ຈະ​ເປັນ​ນາຍ​ເຮົາ​ອີກ​ເທື່ອ​ນຶ່ງ)
– ໄດ້ຄ່າຕອບແທນ ບໍ່ວ່າຈະເປັນທັ່ງຄ່າຈ້າງ ລວມທັ່ງຊື່ສຽງ
– ໄດ້​ຄວາມ​ພາກ​ພູມ​ໃຈ
– ມີ​ຄວາມ​ທ້າ​ທາຍ​ໃນ​ແຕ່​ລະ​ໜ້າວ​ຽກ​ທີ່​ໄດ້​ຮັບ ແລະ ໄດ້​ພັດ​ທະນາ​ຝ​ີ​ມື​ຢູ່​ຕະຫຼອ​ດ​ເວ​ລາ
– ແລະ ມີ​ຜົນ​ໄດ້​ຮັບ​ອື່ນໆ ທີ່​ຈະ​ຕາມ​ມາເຊິ່ງ​ຂຶ້ນ​ກັບ​ຜົນ​ງານ ແລະ ຕົວ​ລູກ​ຄ້າ​ທີ່​ວ່າ​ຈ້າງ.

  •  ການ​ກຽມ​ຄວາມ​ພ້ອມ​ສຳ​ລັບ​ການ​ເຮັດ​ Freelance

– ຕ້ອງ​ໝັ້ນ​ໃຈ​ວ່າ​ເຮົາ​ຈະ​ສາ​ມາດ​ກຳ​ນົດ​ຕາ​ຕະ​ລາງ​ການ​ເຮັດ​ວ​ຽກ​ຂອງ​ເຮົາ​
– ຕ້ອງ​ຮູ້​ຈັກ​ສ້າງ​ເຄືອ​ຂ່າຍ ແລະ ສ້າງ​ຄວາມ​ປະ​ທັບ​ໃຈ​ໃຫ້​ລູກ​ຄ້າ
– ຕ້ອງ​ມີ​ເງີນ​ເກັບ​ອອມ​ເອົາ​ໄວ້​ຢ່າງ​ໜ້ອຍ 4-6 ເທົ່າ​ຂອງ​ລາຍ​ຈ່າຍ​ໃນ​ແຕ່​ລະ​ເດືອນ.

freelance

ການ​ເຮັດ​ວຽກ​ແບບ​ມີ​ອິດ​ສະ​ລະ​ຄື​ສີ່ງຫຼາຍ​ຄົນ​ຕ້ອງ​ການ ແຕ່​ແນ່ນອນ​ວ່າ​ເຮົາ​ກໍ​ຕ້ອງ​ມີ​ລະ​ບຽບ​ກັບ​ຕົວ​ເອງຫຼາຍ​ເຊັ່ນ​ກັນ ເພາະ​ວຽກ​ແບບນີ້​ການ​ແຂ່ງ​ຂັນ​ກໍ​ສູງ ຂຶ້ນ​ຢູ່​ກັບ​ຝີ​ມື​, ຄວາມ​ຮັບ​ຜິດ​ຊອບ ແລະ ຜົນ​ງານ​ຂອງ​ຜູ່ປະ​ກອບກ​ານ​ເອງ.