group_dslr_main 150ກ່ອນຈະໄປເຂົ້າສູ່ເລື່ອງ dSLR ນັ້ນ ເຮົາມາຮູ້ຈັກນຳກັນກ່ອນວ່າ dSLR ແມ່ນຫຍັງ
ແລະມີຫຍັງແດ່  ທີ່ນອກເໜືອໄປຈາກ dSLR? ໂດຍຄຳວ່າ dSLR ນັ້ນ ຫຍໍ້ມາຈາກ
Digital Single-lens reflex ຖ້າຈະແປຕາມໂຕໃຫ້ເປັນພາສາລາວແລ້ວ ກໍຄົງ
ຈະຕ້ອງແປວ່າ “ກ້ອງດິຈິຕອນສະທ້ອນພາບແບບເລນດ່ຽວ” ເຊິ່ງວ່າ ຄຸນສົມ ບັດອັນເປັນທີ່ຮູ້ຈັກກັນແຜ່ຫຼາຍຂອງກ້ອງປະເພດນີ້ ກໍຈະມີໂດຍຫຼັກຢູ່ 3 ຢ່າງຄື:

Viewfinder

LV_OVFlarge_d3_d3x_pentaprism

                                                              Pentaprism ໃນກ້ອງ dSLR ຂອງ Nikon
ການທີ່ເວລາເຮົາ ເບິ່ງຜ່ານຊ່ອງເບິ່ງພາບ ຫຼືທີ່ເອີ້ນວ່າ Viewfinder ນັ້ນ ຈະເຫັນເປັນພາບດຽວກັບທີ່ເລນຖ່າຍທອດອອກມາ
ແລະພາບນັ້ນເອງ ເປັນພາບທີ່ເຮົາຈະໄດ້ເມື່ອເຮົາກົດປຸ່ມຖ່າຍພາບ ຫຼືປຸ່ມ Shutter ໂດຍທີ່ແສງຈະຜ່ານເຂົ້າຫາເລນເປັນລຳ
ດັບທຳອິດ ແລ້ວສະທ້ອນຫາກະຈົກທີ່ຢູ່ ພາຍໃນ ສົ່ງຜ່ານໄປຫາແກ້ວສະທ້ອນພິເສດທີ່ເອີ້ນວ່າ Pentaprism ເພື່ອສົ່ງພາບໃຫ້
ປະກົດຢູ່ Viewfinder ຫຼືຊ່ອງເບິ່ງພາບຢູ່ຫຼັງກ້ອງນັ້ນເອງ. ຫຼາຍທ່ານທີ່ອ່ານແລ້ວ ອາດຈະສົງໄສວ່າ ແລ້ວກ້ອງແບບອື່ນບໍ່ເປັນ
ແນວນີ້ຫຼືຈັ່ງໃດ? ຖ້າທຽບກັບກ້ອງປະເພດອື່ນໆ ທີ່ຈະໄດ້ກ່າວ ໃນລຳດັບຕໍ່ໄປ ແລ້ວນີ້ ນັບວ່າເປັນຄຸນສົມບັດທີ່ແຕກຕ່າງຫຼາຍ ໂດຍສະເພາະເມື່ອປຽບທຽບກັບກ້ອງ Compact ຫຼືກ້ອງ Rangfinder ເພາະກ້ອງເຫຼົ່ານັ້ນ ພາບທີ່ເຫັນ ຈະເປັນຄົນລະພາບທີ່
ກ້ອງຈະບັນທຶກໄວ້ (ຍົກເວັ້ນຈະເບິ່ງຈາກຈໍ LCD ຫຼັງກ້ອງ)

Interchangeable lenses

ສ່ວນນຶ່ງ ທີ່ເປັນສ່ວນທີ່ເຮັດໃຫ້ກ້ອງ dSLR ໄດ້ເປັນທີ່ຮູ້ຈັກຫຼາຍທີ່ສຸດນັ້ນ ກໍຄື ຄຸນສົດບັດໃນການປ່ຽນເລນໄດ້

canon-ef-lenses-2008

Lens ຫຼື ເລນສຳລັບກ້ອງຖ່າຍພາບນັ້ນ ບໍ່ສະເພາະວ່າເປັນຂອງ dSLR ຫຼືກ້ອງຮູບແບບອື່ນໆ ຫາກກ່າວໂດຍຫຍໍ້ແລ້ວ ກໍລ້ວນແລ້ວແຕ່ໃຊ້ ເພື່ອວັດຖຸປະສົງດຽວກັນຄື ເພື່ອສົ່ງຜ່ານແສງເຂົ້າມາຫາ Sensor ຮັບພາບ ຫຼືຖ້າເປັນກ້ອງຟີມ ກໍຈະສົ່ງມາຫາ ແຜ່ນຟີມ ແລະແສງທີ່ຖືກ
ສົ່ງເຂົ້າມານີ້ເອງ ຈະຖືກຕີຄວາມເປັນຮູບພາບ ໂດຍຜ່ານຂະບວນການປະມວນຜົນຂອງກ້ອງຖ່າຍຮູບນັ້ນໆເພື່ອໃຫ້ອອກມາເປັນຮູບພາບ
ຕາມທີ່ເຮົາເຫັນໄດ້.leica_lens_cut_in_half

ເລນ ມີຫຼາຍປະເພດ ຫຼາຍລາຄາ ແລະຫຼາຍຜູ່ຜະລິດ ໂດຍໃນດ້ານ ຂອງການອອກແບບຫຼັກນັ້ນ ແມ່ນຄ້າຍຄືກັນ ແຕ່ຈະມີຄວາມແຕກ ຕ່າງກັນໃນລາຍລະອຽດເລັກໆ ນ້ອຍໆ ໂດຍສະເພາະຫາກວ່າ ເປັນເລນລະບົບ Digital ກໍຈະມີການນຳໃຊ້ແຜງວົງຈອນໄຟຟ້າ ຕ່າງໆ ໄປ
ຈົນລະບົບ Motor ທີ່ເຮັດໃຫ້ສາມາດປັບໂຟກັສໄດ້ອັດຕະໂນມັດນຳ. ກ່າວໂດຍຮວມແລ້ວ ເລນທີ່ເຮົາຈະພົບໃນກ້ອງຖ່າຍພາບ ຈະປະ
ກອບດ້ວຍການນຳແກ້ວຄຸນສົມບັດພິເສດຫຼາຍໆ ອັນມາວາງຊ້ອນກັນ ເພື່ອໃຫ້ເກີດຄຸນລັກສະນະພິເສດຂອງພາບຂຶ້ນມາ ດັ່ງຮູບດ້ານ
ເທິງແມ່ນພາບຜ່າເຄິ່ງຂອງເລນຍີ່ຫໍ້ Leica  ຈະເຫັນວ່າມີແກ້ວຫຼາຍໆ ແຜ່ນຊ້ອນກັນຂຶ້ນໄປຈຳນວນຫຼາຍ

182

                                                    ເລນຍີ່ຫໍ້ Zeiss ສຳລັບກ້ອງ Canon DSLR                                                                                       

ວິທີການອອກແບບເລນນີ້ ນອກຈາກຈະເຮັດໃຫ້ເລນມີຄຸນສົມບັດທີ່ແຕກຕ່າງກັນແລ້ວ ຍັງເຮັດໃຫ້ຮູບຮ່າງພາຍນອກ ມີຄວາມແຕກຕ່າງກັນອີກນຳ

EarlyAFNikkorlenses_big

                 ເລນຍີ່ຫໍ້ Nikon ຈາກຊ້າຍຫາຂວາ  ຈາກ Wide ຫາ Tele ຈະເຫັນວ່າຂະໜາດຂອງເລນມີຄວາມໃຫຍ່ ແລະຍາວຂຶ້ນຕາມລຳດັບ                                                               

Image Sensor

D3X_Sensor_unit

Image Sensor ຫຼືໂຕຮັບພາບນັ້ນ ເປັນສ່ວນສຳຄັນ ທີ່ສຸດຂອງກ້ອງ dSLR ຫຼືກ້ອງ Digital ທັງຫຼາຍ ເພາະມັນ ປຽບສະເໝືອນຟີມໃນ
ຍຸກກ້ອງ Digital ເລີຍກໍວ່າໄດ້. Sensor ທີ່ນິຍົມໃຊ້ ໃນກ້ອງປັດຈຸບັນ ຈະມີສອງປະເພດຄື CCD ທີ່ຫຍໍ້ ມາຈາກ Charge-Coupled Device
ແລະ CMOS ທີ່ຫຍໍ້ມາຈາກ Complimentary Metal-Oxide Semiconductor ໂດຍທີ່ Sensor​ ທັງສອງປະເພດນີ້ ຈະມີຄຸນສົມບັດ
ຂໍ້ດີ-ຂໍ້ອ່ອນ ທີ່ແຕກຕ່າງກັນໄປ ແຕ່ສິ່ງທີ່ຄືກັນແມ່ນ: ມີໜ້າທີ່ ປ່ຽນແສງທີ່ຮັບເຂົ້າມາຈາກເລນ ໃຫ້ກາຍເປັນ ສັນຍານໄຟຟ້າ ເພື່ອໃຫ້ ເກີດເປັນຮູບພາບຂຶ້ນມາໄດ້.

Sensor ຂອງກ້ອງ dSLR ມີຄວາມພິເສດ ແລະ ໂດດເດັ່ນ ແຕກຕ່າງຈາກກ້ອງຖ່າຍຮູບລາຄາບໍ່ແພງ ເຊັ່ນກ້ອງ Compact ຢູ່ບ່ອນວ່າ
ມີຂະໜາດທີ່ໃຫຍ່ກວ່າ ນັ້ນໝາຍຄວາມວ່າ ມັນສາມາດຮັບແສງໄດ້ດີກວ່າ ແລະ ມີຄວາມລະອຽດທີ່ຊັດເຈນກວ່າກ້ອງທີ່ໃຊ້ Sensor ນ້ອຍ.

sensor-size-summary

ສຳລັບກ້ອງ dSLR ໃນທ້ອງຕະຫຼາດຈະມີຂະໜາດຂອງ Sensor ຫຼັກໆ​ຢູ່ສອງແບບຄື Full frame ແລະ APS-C ເມື່ອເບິ່ງຈາກຕາຕະລາງແລ້ວ ຈະເຫັນວ່າ ກ້ອງທີ່ມີ Sensor ແບບ Full frame ນັ້ນ ມີຂະໜາດຂອງ Sensor​ໃຫຍ່ທີ່ສຸດ ຮອງລົງມາແມ່ນ APS-C ເຊິ່ງຈະມີຂະໜາດນ້ອຍລົງ 1.5 ເທົ່າ ນອກຈານັ້ນ ກໍຍັງມີ Sensor ຂະໜາດອື່ນໆອີກ ເຊັ່ນ APS-H, Four Thirds ແລະກ້ອງນ້ອຍໆ ແບບ Compact ທົ່ວໄປ ກໍຍັງຈະມີຂະ ໜາດ ທີ່ນ້ອຍລົງໄປອີກຕາມລຳດັບ

IMG_5119

UMC_0602

ຮູບຊ້າຍ ຖ່າຍດ້ວຍກ້ອງ Compact ເຊິ່ງມີ Sensor ທີ່ນ້ອຍກວ່າຮູບຂວາທີ່ເປັນກ້ອງ Full frame ເຮັດໃຫ້ມີມິຕິພາບທີດ້ອຍກວ່າ

ທີ່ສຳຄັນ ການທີ່ມີ Sensor ຮັບພາບຂະໜາດໃຫຍ່ນີ້ເອງ ທີ່ເຮັດໃຫ້ແຍກມິຕິຂອງວັດຖຸ  ສິ່ງທີ່ຖ່າຍໃນພາບ ອອກມາຈາກພື້ນຫຼັງໄດ້ ຫຼືທີ່ຫຼາຍຄົນມັກເອີ້ນວ່າ ຊັດໜ້າ blur ຫຼັງ ນັ້ນເອງ (ຂໍຂອບໃຈນ້ອງມຸ້ຍທີ່ເປັນແບບໃຫ້) ສຳລັບຂໍ້ມູນດ້ານເລິກຂອງ Image Sensor ນີ້ ແມ່ນຈະມີກ່າວເຖິງເພີ່ມເຕີມໃນຖັດໆ ໄປຕື່ມ

PixelatedCameras-dslr-compact

ຫຼັງຈາກທີ່ເຮົາໄດ້ຮູ້ຈັກຄຸນສົມບັດເດັ່ນຂອງກ້ອງ dSLR ກັນໄປແລ້ວ ກໍມາຮູ້ຈັກກັບກ້ອງປະເພດອື່ນໆ ໃນທ້ອງຕະຫຼາດ ວ່າມີປະເພດໃດແດ່ ແລະມີຄຸນສົມບັດຄວາມແຕກຕ່າງກັນແນວໃດເມື່ອທຽບກັບ ກ້ອງ dSLR ໂດຍເລີ່ມຕົ້ນກັນທີ່ກ້ອງທີ່ຄຸ້ນເຄີຍກັນດີຄື:

Compact Camera

sony-dsc-t50-1Samsung_TL210img4cb2a5681fef6__66668

ສຳລັບກ້ອງຄອມແພັກ ຫຼື Point-and-shoot camera ນັ້ນ ເປັນກ້ອງ ທີ່ນິຍົມໃຊ້ກັນທົ່ວໄປທຸກເພດທຸກໄວ ມີຂະໜາດນ້ອຍ ນ້ຳໜັກເບົາ ລາຄາບໍ່ແພງ ມີໂໝດການຖ່າຍພາບທີ່ຮຽນຮູ້ໄດ້ງ່າຍ ບໍ່ຈຳເປັນຕ້ອງສຶກສາ ຫຼືເຂົ້າຫຼັກສູດ ອົມຮົມໃດໆ ກໍສາມາດນຳໃຊ້ໄດ້ ສົມຊື່ Point-and-shoot​ ຫຼືເລັງແລ້ວຖ່າຍ ນັ້ນເອງallroundview

ຈຸດເດັ່ນຂອງກ້ອງປະເພດນີ້ນອກຈາກທີ່ກ່າວໄປຂ້າງຕົ້ນ ຄືເລື່ອງ ການອອກແບບ ສີສັນ ແລະຮູບຮ່າງທີ່ສວຍງາມ ທັນສະໄໝ ບາງຮຸ່ນກໍມີ ສອງຈໍ ຄືຈໍຫຼັງຕາມປົກກະຕິ ແລ້ວຍັງມີຈໍໜ້າ ເພື່ອໃຫ້ສາມາດຖ່າຍພາບຕົນເອງໄດ້ງ່າຍ  ສຳລັບກ້ອງຮຸ່ນໃໝ່ໆ ຂອງກ້ອງປະເພດ Compact ແມ່ນຈະມີ feature​ ຫຼືຄວາມສາມາດທີ່ຖືກເພີ່ມເຂົ້າມາ ຢ່າງຫຼວງຫຼາຍ ບໍ່ວ່າຈະເປັນການຖ່າຍພາບ Panorama, HDR, ແລະການຖ່າຍວິດີໂອ ຄວາມລະອຽດສູງເປັນຕົ້ນ

ຈຸດອ່ອນ ເມື່ອທຽບກັບກ້ອງ dSLR ແລ້ວ ກໍຈະເປັນເລື່ອງຂອງ ຄວາມໄວຂອງການເຮັດວຽກ ເພາະ ກ້ອງ Compact​ ສ່ວນໃຫຍ່ ຈະໃຊ້ເວລາ ດົນເລັກນ້ອຍ ໃນການ ປະມວນຜົນຮູບພາບ ເຊິ່ງຫາກທ່ານຕ້ອງການຖ່າຍພາບ ກິລາ ຫຼືກິດຈະກຳທີ່ມີ ການເຄື່ອນໄຫວໄວໆ ແລ້ວ ຄົງຈະບໍ່ ເປັນໂຕເລືອກທີ່ດີເທົ່າໃດ. ຕໍ່ມາ ແມ່ນເລື່ອງຄຸນນະພາບຂອງ ໄຟລ໌ຮູບພາບທີ່ໄດ້ ແມ່ນຈະບໍ່ສູ້ກ້ອງ dSLR ເນື່ອງຈາກກ້ອງປະເພດນີ້ ມີ Sensor ຂະໜາດນ້ອຍ ແຕ່ມີຈຳນວນ Pixel ຖືກຍັດເຂົ້າໄປຫຼາຍຈົນເກີນຄວນ ເຮັດໃຫ້ພາບອອກມານັ້ນບໍ່ຄົມຊັດເມື່ອທຽບກັບກ້ອງ dSLR ທີ່ມີຈຳນວນ Pixel​ ໜ້ອຍກວ່າ ຫຼືເທົ່າກັນ ຍົກເວັ້ນກ້ອງ​ Compact ລະດັບ High-end ເຊິ່ງມີລາຄາໃກ້ຄຽງ ຫຼືເທົ່າກັບກ້ອງ dSLR ຮຸ່ນຕ່ຳສຸດ ຈຶ່ງຈະມີຄຸນນະພາບ ຂອງໄຟລ໌ພາບສູສີກັນ ແລະມີໂໝດການຖ່າຍພາບ ທີ່ຄ້າຍກັບກ້ອງ dSLR ດັ່ງເຊັ່ນ Canon G12 ດ້ານ ເທິງ ເຊິ່ງເປັນກ້ອງ Compact ຄຸນນະພາບສູງຈາກ Canon

dSLR-Like

HS10_RIGHT_FRONT

ສຳລັບກ້ອງປະເພດ dSLR-Like ຟັງຊື່ອາດຈະຄ້າຍໆ dSLR ແຕ່ມີຄຳວ່າ Like ຢູ່ທ້າຍ ໝາຍຄວາມວ່າ ເປັນກ້ອງທີ່ມີຮູບຮ່າງ ແລະຄຸນສົມບັດ ຄ້າຍກັບກ້ອງ dSLR ແຕ່ບໍ່ແມ່ນກ້ອງ dSLR ຫຼືໃນອີກ ຄວາມໝາຍນຶ່ງ dSLR-like ແມ່ນ ກ້ອງ Compact ທີ່ມີຮູບຮ່າງ ພາຍ ນອກຄ້າຍກັບ ກ້ອງ dSLR ແລະມີ ໂໝດການຖ່າຍພາບທີ່ຄ້າຍກັນ ແຕ່ມີ Sensor ຂະໜາດເທົ່າກັບ ຫຼືໃຫຍ່ ກວ່າກ້ອງ Compact ເລັກນ້ອຍ

ຂໍ້ດີຂອງກ້ອງປະເພດນີ້ ເມື່ອທຽບກັບ dSLR ແທ້ໆແລ້ວ ແມ່ນລາຄາຖືກກວ່າ ມີເລນທີ່ຄອບຄຸມໄລຍະການຖ່າຍ ພາບຫຼາຍພໍສົມຄວນ ແລະມີ function ທີ່ໃຊ້ໃນການຖ່າຍພາບຫຼາກຫຼາຍ ເຊັ່ນໂໝດ M, P, S​ ແລະ A ເປັນຕົ້ນ ນອກຈາກນັ້ນ ບາງຮຸ່ນ ຍັງມີວົງແຫວນປັບໂຟກັສທີ່ກະ ບອກເລນອີກນຳ (ໃນຂະນະທີ່ກ້ອງ Compact ນັ້ນ ບໍ່ມີ ແລະບໍ່ສາມາດເຮັດໄດ້) ເປັນກ້ອງທີ່ ເໝາະສຳລັບຜູ່ທີ່ສົນໃຈການຖ່າຍພາບຢ່າງຈິງຈັງ ແຕ່ບໍ່ມີງົບປະມານພໍຈະ ຊື້ກ້ອງ dSLR ໄດ້ ກໍເປັນໂຕເລືອກທີ່ດີ ເນື່ອງຈາກຮູບຮ່າງທີ່ໃກ້ຄຽງກັນ ແລະມີໂໝດຖ່າຍພາບຕ່າງໆ ທີ່ຄ້າຍກັນ ສາມາດໃຊ້ເພື່ອເຝິກແອບໃນເບື້ອງຕົ້ນໄດ້

ໃນດ້ານຂໍ້ດ້ອຍ ແມ່ນເລື່ອງຄຸນນະພາບຂອງຮູບພາບທີ່ໄດ້ ແມ່ນຕ່ຳກວ່າກ້ອງ dSLR ເນື່ອງຈາກ Sensor ທີ່ມີຂະໜາດນ້ອຍ ປະກອບກັບເລນ ສ່ວນໃຫຍ່ທີ່ມາກັບກ້ອງປະເພດນີ້ ເປັນເລນ Super-Zoom ກ່າວຄື ມີອັດຕາການຂະຫຍາຍທີ່ສູງ ເຊັ່ນບາງຮຸ່ນອາດຈະຂະຫຍາຍພາບດ້ວຍ Optical Zoom (ຄືການຂະຫຍາຍ ໂດຍຜ່ານແກ້ວເລນ) ໄດ້ສູງສຸດເຖິງ 30 ເທົ່າ ເຮັດໃຫ້ຄຸນນະພາບຕົກຕ່ຳລົງເມື່ອໃຊ້ຮ່ວມກັບ Sensor ທີ່ມີຂະໜາດນ້ອຍດັ່ງກ່າວມາຂ້າງຕົ້ນ ແລະສຸດທ້າຍ ກ້ອງ dSLR-Like ບໍ່ສາມາດຖອດປ່ຽນເລນໄດ້.

Mirrorless Camera

olympus-epl1-01

ກ້ອງປະເພດສຸດທ້າຍທີ່ຈະມາກ່າວກັນໃນສະບັບນີ້ແມ່ນກ້ອງ Mirrorless ຫຼືກ້ອງທີ່ບໍ່ມີກະຈົກ ສະທ້ອນພາບ ເຊິ່ງຫາກເບິ່ງຈາກພາຍນອກ ແລ້ວ ຈະເຫັນວ່າ ມີຮູບຮ່າງຄ້າຍກັບກ້ອງ Compact ຫຼາຍ ເພາະກ້ອງປະເພດນີ້ ຈະມີຂະໜາດນ້ອຍ ກະທັດຮັດ

ເຖິງວ່າຮູບຮ່າງພາຍນອກຂອງກ້ອງ Mirrorlessຈະນ້ອຍພໍໆ ກັບກ້ອງ Compact ແຕ່ວ່າ Sensor ພາຍໃນນັ້ນ ໃຫຍ່ກວ່າກ້ອງ Compact (ຮວມເຖິງdSLR-Like) ຫຼາຍ ໂດຍສ່ວນໃຫຍ່ແລ້ວ ຈະມີຂະໜາດ Sensor ເປັນແບບ Four-thirds ຫຼື APS-C ເຊິ່ງແບບຫຼັງນີ້ ຖືໄດ້ວ່າ ໃຫຍ່ເທົ່າກັບກ້ອງຖ່າຍປະເພດ dSLR ເລີຍ ນັ້ນໝາຍຄວາມວ່າ ຄຸນນະພາບຂອງພາບ ແມ່ນສູງຫຼາຍ ທຽບໄດ້ກັບກ້ອງ dSLR ຮຸ່ນກາງໆ ໄດ້ສະບາຍ ແລະທີ່ສຳຄັນໄປກວ່ານັ້ນກ້ອງ Mirrorless ສາມາດປ່ຽນເລນໄດ້ນຳ

sony_nex-5n

ນັ້ນໝາຍຄວາມວ່າ ຜູ່ໃຊ້ກ້ອງ Mirrorless ຈະມີ ສິດເລືອກໃຊ້ເລນໄດ້ເພີ່ມເຕີມ ແລ້ວແຕ່ຄວາມ ຕ້ອງການ ເຊິ່ງເລນຂອງກ້ອງປະເພດນີ້ແມ່ນ ຈະມີ ຂະໜາດນ້ອຍຫຼາຍ (ແຕ່ລາຄາແພງບໍ່ນ້ອຍ) ຫາກ ທຽບກັບເລນຂອງກ້ອງ dSLR ແຕ່ຜູ່ໃຊ້ກ້ອງ Mirrorless ກໍບໍ່ຈຳເປັນຕ້ອງຊື້ເລນສຳ ລັບກ້ອງ Mirrorless ສະເໝີໄປ ເພາະສາມາດໃຊ້ເລນ ທີ່ອອກແບບສຳລັບກ້ອງ dSLR ຫຼືກ້ອງຟີມມາ ໃຊ້ໄດ້ນຳ ໂດຍຜ່ານໂຕແປງ mount ຫຼື lens adapter ທີ່ມີຂາຍກັນໂດຍທົ່ວໄປ.

ສາເຫດທີ່ກ້ອງ Mirrorless ມີຂະໜາດນ້ອຍ ແຕ່ Sensor ພາຍໃນພັດມີຂະໜາດໃຫຍ່ໄດ້ນັ້ນ ເປັນເພາະວ່າມັນ ໄດ້ຕັດເອົາກະຈົກສະທ້ອນພາບ ອອກໄປດັ່ງທີ່ກ່າວໃນຕອນຕັ້ນ ເຊິ່ງການຕັດເອົາກະຈົກສະທ້ອນພາບອອກນີ້ເອງ ເຮັດໃຫ້ບໍ່ຈຳເປັນຕ້ອງມີ Pentaprism ໃຫ້ເປືອງພື້ນທີ່ ແຕ່ນັ້ນ ຕ້ອງແລກກັບການໂຟກັສພາບທີ່ຊ້າກວ່າ dSLR ແລະບໍ່ມີ Viewfinder ໃຫ້ເບິ່ງ ຈຳເປັນຕ້ອງເບິ່ງຜ່ານ​ Optical Finder ແລະ LCD ຫຼັງກ້ອງ ແທນ. ສ່ວນດ້ານລາຄາ ແມ່ນມີລາຄາໃກ້ຄຽງກັບ dSLR ຮຸ່ນນ້ອຍ ຫາກາງ.pentax_q_lenses

ສຳລັບບົດຄວາມເລື່ອງ dSLR ກໍຄົງຈະຕ້ອງສິ້ນສຸດລົງພຽງເທົ່ານີ້ ຕອນໜ້າຈະພາທ່ານຜູ່ອ່ານໄປ ພົບກັບກ້ອງ dSLR ປະເພດຕ່າງໆ ວ່າມີຈັກ ປະເພດ ແຕ່ລະປະເພດແຕກຕ່າງກັນແນວໃດ ມີຈັກຍີ່ຫໍ້ ຄວາມໂດດເດັ່ນຂອງແຕ່ລະຍີ່ຫໍ້ ຮວມເຖິງວິທີການເລືອກໃຊ້ ເຊິ່ງໃຜທີ່ສົນໃຈເລື່ອງ ກ້ອງ dSLR ກໍສາມາດຕິດຕາມ ກັນໄດ້ໃນຕອນຕໍ່ໆ ໄປ.

ໂດຍ ທະນະວໍລະກິດ ກຸນທະວັດພິນໂຍ