fleaເຫັນຂ່າວທີ່ນັກຮ້ອງຂວັນໃຈຂອງຜູ່ຂຽນ ສາວ Avril Lavigne ອອກມາໃຫ້ສຳພາດກັບວາລະສານ People ວ່າຕົນເອງ​ເກືອບເອົາຊີວິດ​ບໍ່ລອດຍ້ອນຖືກ​ເຫັບກັດແລ້ວ (ເກືອບຈະບໍ່ໄດ້ເຫັນ​ໜ້າສາວຕາແພນດ້າ​ໄປຕະຫຼອດການແລ້ວ) ຕ່ອມຄວາມຢາກ​ຮູ້ມັນກໍເຮັດ​ວຽກທັນທີ ແລະ ກໍຢາກຮູ້ຢ່າງແຮງ​ດ້ວຍວ່າອັນເຫັບ​ທີ່ມັນຢູ່ນຳສັດ ມັນຈະເຮັດໃຫ້​ຄົນເຮົາເກືອບເອົາ​ຊີວິດບໍ່ລອດໄດ້ຂະໜາດ​ນັ້ນເລີຍຫຼືແນວໃດ?

ພໍໄປຫາຂໍ້ມູນແບບລະອຽດເຈາະເລິກຢ່າງລະອຽດຖີ່ຖ້ວນ (ເວົ້າໄດ້ວ່າອ່ານບັນດາ​ເອກະສານການແພດຕ່າງໆ​ຈົນເກືອບຈົບ Doctor ຍ້ອນ) ກໍເຮັດໃຫ້ອຶ້ງ​ໄດ້ອີກກວ່າເກົ່າ ເພາະບັນດາເຫັບ, ໝັດທີ່ມັນ​ເຮັດໃຫ້ຄົນເກືອບ​ເອົາຊີວິດ​ບໍ່ລອດ ແມ່ນມັນ​ຢູ່ນຳບັນດາ​ສັດຊະນິດ​ຕ່າງໆ ໂດຍສະເພາະ​ສັດລ້ຽງສຸດ​ຮັກສຸດຫວງ ທີ່ຄົນເຮົາມັນ​ໄປກິ້ງເກືອກລີເລືອ​ນຳຢ່າງພວກໝາ​ແມວທັງຫຼາຍ​ນັ້ນລະ ເຊິ່ງພວກເຫັບ, ໝັດທັງຫຼາຍ​ທີ່ຢູ່ນຳພວກ​ສັດຕ່າງໆ ເວລາທີ​ມັນກັດຄົນ ຈະເຮັດ​ໃຫ້ເປັນ​ຫຼາຍພະຍາດ ເຊັ່ນ: Tularemia ຫຼື ໄຂ້ກະຕ່າຍ, Lyme Disease ແລະ ແມ່ນແຕ່ພະຍາດ​ສຸດແປກທີ່​ບໍ່ຄິດວ່າຈະ​ມີຢ່າງ ພູມແພ້ຊີ້ນງົວ ແລະ ກໍຍັງມີພະຍາດ​ອື່ນໆອີກຫຼາຍພະຍາດ.

images (4)

ອັນນີ້ເປັນຮູບທີ່ເຫັບກຳລັງກັດຄົນ

ອາການໃນຂັ້ນທຳອິດຫຼັງຈາກທີ່ຖືກກັດ ກໍຈະເປັນຕຸ່ມແດງຢູ່ບໍລິເວນທີ່ຖືກກັດ ແລະ ກໍຈະມີອາການຄັນນຳມາ ແລ້ວກໍຈະມີອາການເຈັບຫົວໂຕຮ້ອນ ໄຂ້ຂຶ້ນ, ຕ່ອມນ້ຳເຫຼືອງໄຂ່ ຫາກປ່ອຍໄວ້ດົນໂດຍບໍ່ໄດ້ຮັບການປິ່ນປົວ ອາການກໍຈະຮຸນແຮງຂຶ້ນເລື້ອຍໆ ໂດຍຈະມີອາການປວກກ້າມເນື້ອ, ບວມຕາມຕົນໂຕ, ກ້າມເນື້ອອ່ອນແຮງ ຫຼື ເປັນອຳມະພາດ ແລະ  ບາງຄົນອາດເຖິງຂັ້ນເສຍຊີວິດໄດ້ ແລະ ບັນດາເຫັບ, ໝັດຈາກສັດທີ່ເປັນພາຫະນຳເຊື້ອອັນຕະລາຍທັງຫຼາຍນັ້ນ ແມ່ນພົບຫຼາຍໃນເອີລົບ, ອາເມລິກາ, ອາຟຣິກາ, ອົດສະຕາລີ (ວ່າງ່າຍໆແມ່ນພົບຫຼາຍໃນຕ່າງປະເທດ) ໂດຍສະເພາະແມ່ນຢູ່ໃນເຂດທີ່ມີປ່າ, ມີພຸ່ມໄມ້ໜາ ແລະ ຕົ້ນໄມ້ໃຫຍ່ ສ່ວນຢູ່ເຂດຮ້ອນຊຸ່ມແບບບ້ານເຮົາແມ່ນພົບໄດ້ໜ້ອຍ ເຖິງຢ່າງນັ້ນ ເຮົາກໍຍັງປະໝາດບໍ່ໄດ້ວ່າເຫັບ, ໝັດທີ່ມັນຢູ່ນຳສັດໃກ້ໂຕເຮົາ ຈະບໍ່ເປັນອັນຕະລາຍຫຍັງເລີຍ.

ຖ້າຈະຖາມຜູ່ຂຽນວ່າອັນເຫັບ, ໝັດທີ່ມັນເຮັດໃຫ້ເກີດພະຍາດຕ່າງໆນັ້ນຊື່ຫຍັງ?? ຊະນິດໃດ?? ຕອບໄດ້ເຕັມປາກເຕັມສຽງເລີຍວ່າຈື່ບໍ່ໄດ້ ເພາະມັນເປັນຊື່ທາງວິທະຍາສາດທີ່ອ່ານຍາກສຸດໆ ແຖມຍັງຍາວເປັນຫາງວ່າວເລີຍ ແລະ ເຮົາກໍບໍ່ຈຳເປັນຕ້ອງໄປຮູ້ຊື່ມັນດອກ (ຫາກໃຜສົນໃຈທີ່ຈະສຶກສາອີ່ຫຼີກໍໄປຫາຂໍ້ມູນເພີ່ມເຕີມໄດ້ເດ​ີ້) ຮູ້ໄວ້ແຕ່ວ່າເຮົາບໍ່ສາມາດໄປຈຳແນກໄດ້ດ້ວຍຕາເປົ່າຂອງເຮົາໄດ້ວ່າເຫັບໂຕໃດທີ່ເຮັດໃຫ້ເປັນພະຍາດຫຍັງ ມີແຕ່ຈັບເຂົ້າຫ້ອງວິເຄາະ ແລະ ວິເຄາະຢ່າງລະອຽດເທົ່ານັ້ນຈຶ່ງສາມາດຈຳແນກໄດ້ (ຜູ່ອ່ານຜູ່ໃດທີ່ກຳລັງຄິດຈະຄວບຄຸມນ້ຳໜັກດ້ວຍການໃຫ້ເຫັບທີ່ເຮັດໃຫ້ເກີດພູມແພ້ຊີ້ນກັດ ຈະໄດ້ກິນແຕ່ຜັກ ກໍຕັດອອກຈາກຄວາມຄິດດ່ວນ ເພາະນັ້ນຄືການເອີ້ນຍົມມະທຸດມາເອົາຊີວິກ່ອນໄວອັນຄວນ) ແລະ ຜູ່ໃດທີ່ມີສັດລ້ຽງ ກໍຄວນໝັ່ນທຳຄວາມສະອາດໃຫ້ສັດລ້ຽງດ້ວຍ ແລ້ວກໍຢ່າໄປຂ້າເຫັບ, ໝັດດ້ວຍການບີບໃຫ້ມັນແຕກຢ່າງທີ່ຫຼາຍຄົນມັກເຮັດເດັດຂາດ (ເຖິງມັນຈະມ່ວນ ແລະ ສະໃຈປານໃດກໍຕາມ) ເພາະນັ້ນອາດເປັນການຊ່ວຍໃຫ້ມັນກະຈາຍພັນໄດ້ໄວຂຶ້ນ ແຖມເຮົາອາດໄດ້ຮັບເຊື້ອໂຕເຫັບໄດ້ງ່າຍຂຶ້ນອີກດ້ວຍ ທາງທີ່ດີແມ່ນພາໄປຫາສັດຕະວະແພດ ທີ່ເພິ່ນຊ່ຽວຊານສະເພາະທາງກຳຈັດໃຫ້ດີກວ່າ.