Post_photo

ວັນພະຫັດ 31 ມີນາ 2016 ທີ່ຜ່ານມາ ໄດ້ມີພິທີເປີດໂຕຫ້ອງຂາຍຜະລິດຕະພັນຂອງບໍລິສັດ ອາໂລເທັກໂນໂລຍີ (ALO!) ເຊິ່ງເປັນຜະລິດຕະພັນຄອມພິວເຕີ (PC) ນຳໃຊ້ລະບົບປະຕິບັດການ Windows ແລະຖືເປັນຄອມພິວເຕີແບຣນທຳອິດຂອງຄົນລາວ.

20160331_101923
ບັນ​ຍາ​ກາດ​ໃນ​ຫ້ອງ​ຂາຍ ALO! ໃນ​ມື້​ພິ​ທີ​ເປີດ​ໂຕ

ໃນພິທີມີການນຳສະເຫນີຈຸດປະສົງ, ຄວາມເປັນມາຂອງບໍລິສັດ ພ້ອມແຂກຈາກພາກສ່ວນຕ່າງໆ ໂດຍສະເພາະກະຊວງສຶກສາທິການແລະກິລາ ເຊິ່ງຈະໄດ້ມີການຮ່ວມມືກັບອາໂລ! ເພື່ອນຳເອົາຄອມພິວເຕີ ທີ່ເຮັດໂດຍຄົນລາວ ແລະລາຄາເຫມາະສົມກັບຄົນລາວ ໄດ້ໃຫ້ເດັກນ້ອຍນຳໃຊ້ເຂົ້າໃນການສຶກສາ, ພ້ອມນັ້ນກໍມີໂຕແທນຈາກບໍລິສັດ Microsoft ຂອງພາກພື້ນອາຊີ-ປາຊີຟິກ ເຂົ້າຮ່ວມເພື່ອເຊັນສັນຍາຮ່ວມມືກັບ ອາໂລ! ໃນການນຳເອົາລະບົບປະຕິບັດການ Windows ແບບ OEM ລິຂະສິດແທ້ຕິດຕັ້ງກັບຄອມພິວເຕີຂອງ ອາໂລ! ທຸກເຄື່ອງ.

20160331_101934
ALO! T12 ເປັນ​ແທັບ​ເລັດ​ຈໍ​ສຳ​ຜັດ​​ໃສ່​ແປ້ນ​ພິມ​ໄດ້
20160331_102057
PC ຈາກ ALO! ໃນ​ຊ່ວງ​ນີ້​ຊື້​ແລ້ວ​ເພິ່ນ​ແຖມ​ແປ້ນ​ພິມ ແລະ ເມົ້າ​ສ໌​ໄຮ້​ສາຍ​ແບ​ຣນ ALO! ໃຫ້​ພ້ອມ

20160331_102106

ທ່ານ ທະນຸສອນ ພົນອາມາດ ຜູ່ກໍ່ຕັ້ງບໍລິສັດອາໂລເທັກໂນໂລຍີ ໄດ້ກ່າວເຖິງຄວາມເປັນມາຂອງຊື່ອາໂລ! (ALO!) ວ່າມີຄວາມຫມາຍທີ່ສື່ໃຫ້ເຫັນເຖິງຄວາມເປັນລາວ ເພາະເມື່ອນຳອັກສອນທັງສາມມາຈັດລຽງກັນໃຫມ່ຈະໄດ້ຄຳວ່າລາວ (Alo = Lao) ນອກນັ້ນໃນອະນາຄົດມໍ່ໆນີ້ ທາງບໍລິສັດຍັງມີແຜນຜະລິດໂທລະສັບມືຖືມາຈຳຫນ່າຍ ເຊິ່ງຈະເຮັດໃຫ້ເຂົ້າກັບຊື່ຂອງບໍລິສັດ ນັ້ນກໍຄື ທຸກຄັ້ງທີ່ຄົນລາວຍົກໂທລະສັບຂຶ້ນມາ ຄຳທຳອິດທີ່ຈະເວົ້າແມ່ນ ອາໂລ.

20160331_102143
ALO! TV116 ລາ​ຄາ​ຊ່ວງ​ໂປ​ຣ​ໂມ​ຊັນ 2,288,000 ກີບ ຈາກ 2,860,000 ກີບ
20160331_102228
ALO! Tab 7A ລາຄາພິເສດຊ່ວງນີ້ 583,000 ກີບ

ປັດຈຸບັນຫ້ອງຂາຍຂອງ ອາໂລ! ຕັ້ງຢູ່ ບ້ານສີເມືອງ ເມືອງສີສັດຕະນາກ ນະຄອນຫລວງວຽງຈັນ ທ່ານໃດສົນໃຈສາມາດແວ່ເບິ່ງແວ່ຊົມສິນຄ້າຂອງ ອາໂລ! ໄດ້ ເຊິ່ງມີການຈັດສະແດງ ແລະໃຫ້ທົດລອງນຳໃຊ້ກ່ອນຊື້ໄດ້ ໂດຍປັດຈຸບັນຜະລິດຕະພັນທີ່ພ້ອມວາງຂາຍ ປະກອບໄປດ້ວຍ ຄອມພິວເຕີຕັ້ງໂຕະແບບ All-in-one PC ເຊິ່ງນຳໃຊ້ສະເປັກພາຍໃນເປັນຫນ່ວຍປະມວນຜົນໃຫມ່ຫລ້າສຸດ Intel Skylake  ພ້ອມຫນ້າຈໍແບບສຳຜັດ ແລະຄອມພິວເຕີແບບພົກພາ 2-in-1 ເຊິ່ງສາມາດຖອດແຍກຈໍອອກເປັນແທັບເລັດໄດ້. ສ່ວນລາຍລະອຽດສະເປັກແລະການນຳໃຊ້ຈະເປັນແນວໃດນັ້ນ ທາງທີມງານ e-Corner ຈະນຳມາຣີວິວຢ່າງເຈາະເລິກ ໃນອະນາຄົດນີ້ຢ່າງແນ່ນອນ ຈະໄດ້ຮູ້ວ່າ ຄອມພິວເຕີສັນຊາດລາວນາມວ່າ ອາໂລ! ນີ້ຈະທົນມືທີມງານພວກເຮົາໄດ້ປານໃດ.