ຫລ້າສຸດນັກວິໄຈຄວາມປອດໄພຈາກ Trend Micro ອອກມາບອກວ່າໄດ້ພົບ Malware ໂຕໃຫມ່ໃນ Android ຊື່ວ່າ “Godless” ທີ່ສາມາດລົງແອັບຯໄດ້ເອງ. ໂດຍ Malware ໂຕນີ້ມີເປົ້າຫມາຍຢູ່ທີ່ Android 5.1 Lollipop ລົງມາ ເຊິ່ງຈະກວມເອົາ 90% ຂອງໂທລະສັບ Android ທັງຫມົດເລີຍ.

ທາງ Trend Micro ກ່າວວ່າຕອນນີ້ Godless ນັ້ນໄດ້ຢູ່ໃນ App Store ອື່ນໆ ແລະ Google Play ນຳເຊິ່ງຕອນນີ້ໄດ້ມີໂທລະສັບຫລາຍກວ່າ 850,000 ເຄື່ອງທົ່ວໂລກທີ່ຕິດ Malware ໂຕນີ້ຢູ່

ຄວາມສາມາດຂອງ Godless ນັ້ນສາມາດ root ໂທລະສັບ Android ຂອງເຮົາໄດ້ໂດຍບໍ່ຕ້ອງຕໍ່ກັບຄອມພິວເຕີ ສະນັ້ນເມື່ອເຄື່ອງຖືກ root ແລ້ວ Godless ກໍສາມາດລັກຕິດຕັ້ງແອັບຯໃສ່ເຄື່ອງເຮົາໄດ້ ຫລືວ່າສາມາດລັກເອົາຂໍ້ມູນຂອງເຮົາໄດ້ເລີຍ

ກຸ່ມເປົ້າຫມາຍຂອງ Godless ແມ່ນ Android ເວີຊັນ 5.1 ລົງມາເຊິ່ງຕອນນີ້ກໍມີຫລາຍປະເທດທົ່ວໂລກທີ່ຕິດ Malware Godless ສາມອັນດັບທຳອິດຄື: ໄທ, ອິນໂດເນເຊຍ ແລະຫນັກສຸດແມ່ນ ອິນເດຍທີ່ກວມເອົາເກືອບເຄິ່ງ (46.19%) ຂອງໂທລະສັບທັງຫມົດຂອງໂລກທີ່ຕິດ Godless ຕອນນີ້

ວິທີ່ປ້ອງກັນ Malware Godless

ສຳລັບຕອນນີ້ຍັງບໍ່ມີວິທີທີ່ແນ່ນອນໃນການກຳຈັດ Malware Godless ນີ້ ແຕ່ເຮົາກໍພໍມີວິທີ່ປ້ອງກັນຢູ່ ເຊັ່ນ: ການກວດສອບທີມພັດທະນາແອັບຯກ່ອນວ່າເຊື່ອຖືໄດ້ບໍ່ກ່ອນທີ່ຈະຕິດຕັ້ງແອັບຯ ອາດຈະກົດເຂົາໄປເບິ່ງວ່າຂະເຈົ້າເຮັດແອັບຯຫລາຍບໍ່ ມີຍອດດາວໂຫລດ ການໃຫ້ຄະແນນແອັບຯເປັນແນວໃດ ແລະອີກຢ່າງບໍ່ຄວນລົງແອັບຯພາຍນອກຈາກ Play Store ນອກຈາກນີ້ກໍສາມາດຕິດຕັ້ງ Anti Virus ໄວ້ເພື່ອສະແກນກວດຈັບ ແຕ່ກໍຕ້ອງເລືອກແອັບຯທີ່ມີຊື່ສຽງແນ່ເຊັ່ນກັນ

 

ທີ່ມາ: droidsans.com