IMG_0247_2

ເມື່ອ Huawei ປະກາດຮ່ວມມືກັບ Leica ບໍລິສັດຜະລິດກ້ອງຖ່າຍຮູບຄຸນນະພາບສູງຍັກໃຫຍ່ ກໍຖືວ່າສ້າງຄວາມຮືຮາໃຫ້ວົງການກ້ອງຖ່າຍຮູບໃນມືຖືໄດ້ບໍ່ໜ້ອຍ ແຕ່ຫຼັງຈາກຂ່າວລືໃນດ້ານຕ່າງໆແລ້ວນັ້ນ ສຸດທ້າຍແລ້ວ Huawei P9 ຈະສາມາດເປີດໂລກໃໝ່ໃຫ້ວົງການກ້ອງໃນມືຖືໄດ້ຫຼາຍປານໃດເຮົາມາເບິ່ງກັນ ເພາະເຮົາໄດ້ຮັບອຸປະກອນຈາກ Huawei ປະຈຳປະເທດລາວມາທົດສອບໃນມືແລ້ວ.

Huawei P9 ນັ້ນເປັນໂທລະສັບຮຸ່ນເຮືອທຸງ ຫຼື ຮຸ່ນນຳໜ້າຂອງ Huawei ໂດຍລາຄາວາງຂາຍນັ້ນພຽງແຕ່ປະມານ 4,000,000 ກີບ ເຊິ່ງຖືວ່າຖືກກວ່າ Samsung Galaxy S7, Sony Xperia Z5, LG G5 ຫຼື iPhone 6 ທີ່ຖືວ່າເປັນຮຸ່ນທີ່ສູສີກັນຢູ່ຫຼາຍສົມຄວນ. ເຖິງວ່າລາຄາຈະຖືກກວ່າຮຸ່ນອື່ນໆ ແຕ່ຫຼັງຈາກການນຳໃຊ້ເປັນເວລາຫຼາຍມື້ ຜູ່ຂຽນຕ້ອງບອກໄດ້ເລີຍວ່າລາຄາທີ່ຖືກກວ່ານັ້ນບໍ່ໄດ້ແປວ່າການອອກແບບ ແລະ ວັດສະດຸນັ້ນຖືກກວ່າເລີຍ, ໂຕເຄື່ອງເຕັມໄປດ້ວຍການເກັບລາຍລະອຽດເລັກໆນ້ອຍໆ ແລະມີຄວາມແໜ້ນໜາທົນທານດີ.

[taq_review]

ສະເປັກຂອງ Huawei P9

OS Android 6.0 (Emotion UI 4.1)
CPU Quad-core 2.5 GHz Cortex-A72 & quad-core 1.8 GHz Cortex-A53
ບ່ອນຈັດເກັບຂໍ້ມູນ ແລະ ໜ່ວຍຄວາມຈຳ
ມີ 2 ຮຸ່ນຄື່ 32 GB, 3 GB RAM (EVA-L19/EVA-L09)
ແລະ
64 GB, 4 GB RAM (EVA-L29)
ຮອງຮັບ MicroSD ສູງສຸດເຖິງ 256GB
ຕົວເຄື່ອງ 145 x 70.9 x 7 mm
ນ້ຳໜັກ 144 ກຣາມ
ຮອງຮັບ 2 Nano-SIM
ໜ້າຈໍ 15.2 ນິ້ວ IPS-NEO LCD capacitive touchscreen, 16M ສີ
1080 x 1920 ພິກເຊວ
ແບັດເຕີຣີ 3000 mAh
ກ້ອງ ກ້ອງເຊັນເຊີຄູ່ 12 MP, f/2.2, 27 mm, Leica optics, phase detection autofocus, dual-LED (dual tone) flash

ກ້ອງໜ້າ 8 MP, f/2.4, 1080p

ວິດີໂອ 1080p@60fps, 1080p@30fps, 720p@120fps

ຄວາມສາມາດພິເສດ ຮອງຮັບ fingerprint, ຮອງຮັບໄຟລ໌ສຽງຄວາມລະອຽດສູງ FLAC
ລາຄາ ປະມານ 4,000,000 ກີບ

ການອອກແບບ

Huawei P9 ນັ້ນຖືວ່າເປັນໂທລະສັບທີ່ເຮັດອອກມາໄດ້ບາງ ແລະ ສວຍງາມຫຼາຍ ໂດຍສ່ວນໂຕຮູ້ສຶກວ່າມັກການອອກແບບຂອງ P9 ຫຼາຍກວ່າ Galaxy S7 ໂດຍສະເພາະໃນເລື່ອງຂອງອັດຕາສ່ວນຂອງຂະໜາດໜ້າຈໍ ແລະໜ່ວຍໂທລະສັບນັ້ນ ຖືວ່າໂທລະສັບຂະໜາດຊ່ຳນີ້ທ່ານຈະຫາໜ້າຈໍໃຫຍ່ກວ່ານີ້ບໍ່ໄດ້ແລ້ວ ເຊິ່ງມີຂະໜາດໜ້າຈໍເຖິງ 5.2 ນິ້ວ ໃນຂະນະທີ່ iPhone 6S ໃນຂະໜາດໜ່ວຍຊ່ຳກັນມີໜ້າຈໍແຕ່ 4.7 ນິ້ວເທົ່ານັ້ນ. P9 ນັ້ນມີໃຫ້ເລືອກຢູ່ 3 ສີຄື: ທອງຄຳ, ສີເງິນ ແລະ ສີດຳ.

IMG_0244

ລຳໂພງຂອງ P9 ນັ້ນແມ່ນຈະຢູ່ດ້ານລຸ່ມຂວາມືຂອງໜ່ວຍ ໂດຍຈະມີຮູສຸບຫູຟັງຢູ່ເບື້ອງຊ້າຍ ແລະ ຊ່ອງສຸບສາຍ USB ນັ້ນຈະປ່ຽນມາເປັນ USB Type-C ເຊິ່ງເປັນຮູ USB ແບບໃໝ່ທີ່ໂທລະສັບຮຸ່ນນຳໜ້າຂອງຫຼາຍໆບໍລິສັດໄດ້ປ່ຽນມາໃຊ້ກັນແລ້ວ ເຊິ່ງທາງ Huawei ເພິ່ນກໍແຖມມາໃຫ້ນຳໃນກ່ອງ.

IMG_0248

ດ້ານຫຼັງນັ້ນເຮົາຈະເຫັນໄດ້ສະດຸດຕາທີ່ສຸດຄືເຊັນເຊີກ້ອງທີ່ມີ 2 ອັນ, ລະບົບ flash 2 ສີ ແລະ ລະບົບເລເຊີໂຟກັສ; ຜູ່ຂຽນນັ້ນຊົມເຊີຍທີ່ Huawei ສາມາດເຮັດໃຫ້ເຊັນເຊີກ້ອງທັງ 2 ນັ້ນບໍ່ນູນອອກມາຈາກຕົວເຄື່ອງໄດ້ ເພາະຖືວ່າເປັນບັນຫາຂອງມືຖືທີ່ມີເຊັນເຊີກ້ອງດີໆຫຼາຍຮຸ່ນໃນຊ່ວງຫຼັງໆນີ້ ທີ່ຈະມີກ້ອງໂທລະສັບທີ່ນູນໆອອກມາ ເຮັດໃຫ້ອາດຂັດຂວາງການນຳໃຊ້ ຫຼື ຂູດກັບໂຕະເວລາວາງລົງໄດ້ ເຊິ່ງດຽວເຮົາຈະເວົ້າເຖິງຄວາມສາມາດຂອງກ້ອງໃນພາກສ່ວນຕໍ່ໄປ. ອີກສິ່ງທີ່ທ່ານຈະເຫັນຄືກອບສີ່ຫຼ່ຽມທີ່ຢູ່ດ້ານຫຼັງເທິງ ເຊິ່ງເປັນຈຸດທີ່ໃຊ້ສະແກນລາຍນິ້ວມືຂອງຜູ່ໃຊ້. ປຸ່ມປັບສຽງ ແລະ ເປີດເຄື່ອງນັ້ນຈະຢູ່ເບື້ອງຂວາມືຂອງໂທລະສັບ.

IMG_0249_2

ກ້ອງຖ່າຍຮູບທີ່ຮ່ວມມືເຮັດກັບ Leica

ກ້ອງຖ່າຍຮູບນັ້ນຖືເປັນຫຍັງທີ່ Huawei ນຳມາໃຊ້ເພື່ອການໂປຣໂໝດ ແລະ ດຶງດູດຜູ່ໃຊ້ສຳລັບ P9 ນີ້ຢ່າງເຫັນໄດ້ຊັດ ໂດຍຈະໃຊ້ເຊັນເຊີ 12 ລ້ານພິກເຊວຢູ່ 2 ໂຕ, ໂດຍໂຕນຶ່ງຈະເປັນເຊັນເຊີຖ່າຍຮູບສີປົກກະຕິ ແລະ ອີກອັນເປັນເຊັນເຊີຂາວດຳເພື່ອເກັບລະດັບແສງໄດ້ດີກວ່າ ຍັງບໍ່ໝົດມັນຍັງສາມາດຖ່າຍຮູບເປັນໄຟລ໌ RAW ເພື່ອເອົາໄວ້ປະມວນຜົນຮູບໃນຄອມພິວເຕີໃນພາຍຫຼັງໄດ້ນຳ. ຈາກການທົດສອບແລ້ວນັ້ນ ຖືວ່າກ້ອງຖ່າຍຮູບນັ້ນສາມາດຖ່າຍຮູບອອກມາໄດ້ສູສີກັບ Galaxy S7 ເຊິ່ງຖືວ່າເປັນກ້ອງຖ່າຍຮູບໃນໂທລະສັບທີ່ດີທີ່ສຸດໃນຕອນນີ້ ແຕ່ການຈະຖ່າຍຮູບໂດຍໃຊ້ P9 ໃຫ້ອອກມາໄດ້ດີເລີດນັ້ນຈະຕ້ອງໃຊ້ຄວາມລຶ້ງເຄີຍ ແລະ ປັບແຕ່ງຫຍັງໜ້ອຍນຶ່ງ ນັ້ນກໍອາດເປັນຍ້ອນໂໝດຖ່າຍຮູບ auto ນັ້ນເຮັດອອກມາໄດ້ບໍ່ດີພໍ ເພາະຫຼາຍຄັ້ງໃນບາງສະພາວະກ້ອງຈະບໍ່ສາມາດຖ່າຍຮູບອອກມາໄດ້ສວຍງາມ ເທົ່າກັບທີ່ເຮົາປັບເອງໃນ Pro Mode.

IMG_0254

IMG_20160711_174925
ການໃຊ້ໂໝດ auto ນັ້ນໃນບາງຄັ້ງກໍເຮັດໃຫ້ຮູບອອກມາໄດ້ໜ້າຜິດຫວັງໜ້ອຍນຶ່ງ
IMG_20160711_175520
ແຕ່ໃນສະພາວະທີ່ເໝາະສົມຮູບຖ່າຍນັ້ນອອກມາໄດ້ງາມເລີດ

ສິ່ງນຶ່ງທີ່ Huawei ຍັງກ່າວໄວ້ນັ້ນແມ່ນເພິ່ນວ່າ P9 ນີ້ເປັນກ້ອງມືຖືຮຸ່ນທຳອິດທີ່ສາມາດຖ່າຍຮູບໃຫ້ເປັນ bokeh ໄດ້ ເຊິ່ງຈາກການທົດສອບແລ້ວກໍຖືວ່າແມ່ນສາມາດເຮັດໄດ້ແທ້ ແລະ ເຮັດອອກມາໄດ້ດີທີ່ສຸດທີ່ຂອງກ້ອງມືຖືແລ້ວ ເບິ່ງໄດ້ຈາກຕົວຢ່າງຮູບ 2 ຮູບດ້ານລຸ່ມ (ສຳລັບທ່ານໃດທີ່ບໍ່ເຂົ້າໃຈວ່າ bokeh ແມ່ນຫຍັງນັ້ນ ມັນກໍຄືການຖ່າຍຮູບວັດຖຸດ້ານໜ້າຊັດແຈ້ງ ແຕ່ດ້ານຫຼັງໃຫ້ມົວໆ ຈົນເກີດເປັນເມັດແສງກົມໆຕ່າງໆນັ້ນເອງ)

IMG_20160711_180457

IMG_20160711_182855
ຂະໜາດບໍ່ໄດ້ຕັ້ງໃຈຖ່າຍເອົາ bokeh ກໍຍັງເກີດມີ bokeh ອອກມາໄດ້ດີ

ອີກຈຸດກ່ຽວກ້ອງທີ່ບໍ່ເວົ້າເຖິງບໍ່ໄດ້ຄືການຖ່າຍຮູບຂາວ-ດຳສະໄຕຣ໌ Leica ນັ້ນເອງ ເຊິ່ງຮູບຂາວດຳທີ່ຖ່າຍອອກມານັ້ນ ງາມສຸດໆໆໆໄປເລີຍ ແລະທ່ານຈະຫາກ້ອງມືຖືທີ່ຖ່າຍຮູບຂາວ-ດຳໄດ້ງາມ ມີລະດັບແສງ ແລະ depth ດີກວ່ານີ້ບໍ່ມີອີກແລ້ວໃນປັດຈຸບັນນີ້ ຈົນຫຼາຍໆຄັ້ງຜູ່ຂຽນກໍອົດທີ່ຈະຖ່າຍຮູບຂາວດຳແທນຮູບສີບໍ່ໄດ້ ເພາະຄຸນນະພາບຂອງຮູບຂາວດຳນັ້ນໂດດເດັ່ນກ່ວາຮູບສີຢ່າງຊັດເຈນ.

IMG_20160716_143706

IMG_20160716_144123

[metaslider id=18197]

ຄວາມສາມາດນຳໃຊ້ທົ່ວໄປ

ດ້ານການນຳໃຊ້ນັ້ນດ້ວຍ CPU ລະດັບ quad core ແລະ RAM ເຖິງ 4GB ຈຶ່ງເຮັດໃຫ້ການນຳໃຊ້ທຸກຢ່າງນັ້ນສະບາຍໄດ້ຫາຍຫ່ວງ ນອກນັ້ນລຳໂພງກໍສາມາດໃຫ້ຄຸນນະພາບສຽງໄດ້ຢ່າງໜ້າປະທັບໃຈ ສຽງນັ້ນນຸ້ມນວນ ແລະ ມີມິຕິດີບໍ່ດ້ອຍກວ່າ Galaxy S7 ເລີຍ. ຈຸດເດັ່ນອີກອັນກໍຄືມັນສາມາດຟັງໄຟລ໌ເພງຄຸນນະພາບສູງ FLAC ໄດ້ ເຊິ່ງບໍ່ຮອງຮັບໃນໂທລະສັບໂດຍທົ່ວໆໄປ ແຕ່ດ້ານຫູຟັງທີ່ແຖມມານັ້ນຮູ້ສຶກບໍ່ແໜ້ນຫູ ແລະ ອັດສຽງໄດ້ດີເທົ່າກັບຫູຟັງຂອງ Galaxy S7, ແນວໃດກໍຕາມມັນກໍເປັນພຽງຂໍ້ສັງເກດເລັກນ້ອຍເທົ່ານັ້ນ.

ລະບົບສະແກນລາຍນິ້ວມືທີ່ໄວທີ່ສຸດ!

ຈາກການນຳໃຊ້ແລ້ວ ຜູ່ຂຽນເກືອບບໍ່ເຄີຍເອົາມືໄປກົດປຸ່ມເປີດເລີຍເນື່ອງຈາກນຳໃຊ້ການສະແກນລາຍນິ້ວມືເພື່ອເປີດເຄື່ອງແທນ ເຊິ່ງທຽບຈາກ LG Nexus 5X ທີ່ໃຊ້ຢູ່ນັ້ນຖືວ່າການສະແກນລາຍນິ້ວມືຂອງ Huawei P9 ນັ້ນໄວຫຼາຍຢ່າງໜ້າຕົກໃຈ ພຽງທ່ານເອົານິ້ວແຕະເຊັນເຊີສະແກນລາຍນິ້ວມືດ້ານຫຼັງພຽງສ້ຽວວິນາທີ ເຄື່ອງກໍຈະປົດລັອກໃຫ້ທ່ານໄດ້ທັນທີ ເຊິ່ງປົກກະຕິຂອງໂທລະສັບທົ່ວໆໄປກໍໄວຢູ່ແລ້ວ ແຕ່ P9 ນີ້ເກືອບວ່າທ່ານເອົາມືປັດກາຍເຊັນເຊີກໍປົດລັອກໄດ້ແລ້ວ.

IMG_0257
ກ່ອງນັ້ນເຮັດອອກມາໄດ້ຮຽບງ່າຍ ໂດຍຈະເປັນກ່ອງນ້ອຍໆແບ່ງແຕ່ລະອົງປະກອບອອກຈາກກັນ ແລະວັດສະດຸຈະເປັນຄ້າຍໆຜ້າ canvas

ສິ່ງທີ່ເຮົາມັກ

ການຖ່າຍຮູບຂາວດຳທີ່ມີມິຕິງາມໂອເວີ້, ເຊັນເຊີລາຍນິ້ວມືເຮັດວຽກຢ່າງວ່ອງໄວ, ລຳໂພງດັງດີ ແລະ ສຽງນຸ້ມ, ຮອງຮັບໄຟລ໌ FLAC ແລະ ຖ່າຍຮູບເປັນໄຟລ໌ RAW, ໂຕເຄື່ອງບາງຄືກັບ iPhone.

ສິ່ງທີ່ເຮົາບໍ່ມັກ

ຮູບສີທີ່ຖ່າຍມີ contrast ແລະ ຄວາມຄົມຊັດສູງເກີນໄປບາງຄົນອາດຈະບໍ່ມັກໄດ້, ໂໝດຖ່າຍຮູບ auto ດຶງປະສິດຕິພາບກ້ອງອອກມາໄດ້ບໍ່ເຕັມທີ່, ຫາກເຮັດວຽກໜັກໆໂທລະສັບຖືວ່າຮ້ອນສົມຄວນ, ບໍ່ມີລະບົບສາກໄວພິເສດ.

ທຽບກັນລະຫວ່າງ P9 ແລະ P9 Lite. ສຳລັບ P9 Lite ທີ່ເປັນ P9 ໃນສະບັບທີ່ປະຢັດກວ່າ ຈະມີ review ຢູ່ອີກບົດຄວາມນຶ່ງ
ທຽບກັນລະຫວ່າງ P9 ແລະ P9 Lite. ສຳລັບ P9 Lite ທີ່ເປັນ P9 ໃນສະບັບທີ່ປະຢັດກວ່າ ຈະມີ review ຢູ່ອີກບົດຄວາມນຶ່ງ

ສະຫຼຸບ

Huawei P9 ນັ້ນປະຕິເສດບໍ່ໄດ້ວ່າເປັນໂທລະສັບທີ່ມີຄວາມງາມ ແລະ ໃຫ້ຄວາມຮູ້ສຶກຄືກັບໃຊ້ iPhone ຫຼາຍ, ທັ່ງທາງດ້ານໜ້າຕາຕິດຕໍ່ກັບຜູ່ໃຊ້ ຫຼື UI ນຳ ເຊິ່ງນຳໃຊ້ໄດ້ງ່າຍ ແລະ ສະດວກ. ແນວໃດກໍຕາມແບັດເຕີຣີທີ່ທົນຢູ່ໃນລະດັບພຽງປານກາງເທົ່າໆໂທລະສັບທົ່ວໆໄປ ແລະ ເຄື່ອງທີ່ຮ້ອນເວລາເຮັດວຽກໜັກໆ (ຮ້ອນກວ່າ Galaxy S7) ກໍຖືເປັນຂໍ້ເສຍເລັກນ້ອຍ. ຫາກທ່ານມັກຮູບທີ່ມີ contrast ແລະ ຄວາມຄົມຊັດສູງ P9 ກໍໜ້າຈະເໝາະສົມກັບທ່ານ ແລະຫາກທ່ານຍິ່ງຍັງມັກການຖ່າຍຮູບຂາວດຳແລ້ວນັ້ນ ທ່ານຍິ່ງເບິ່ງຂ້າມມັນໄປບໍ່ໄດ້ ແຖມຍັງຖ່າຍຮູບ selfie ໄດ້ດີບໍ່ດ້ອຍກວ່າໃຜ (ແຕ່ຖ້າທ່ານເປັນຜູ່ຊາຍກໍຢ່າລືມປິດໂໝດ Beauty ແດ່ເດີ້ ຮະຮະ)