Computer Scienceເວົ້າ​ຮອດ​ເລື່ອງ​ນີ້ຜູ່ຂຽນ​ຄິດ​ວ່າ​ຄື​ສິ​ບໍ່​ມີ​ຜູ່​ໃດ​ທີ່​ຮຽນ ຫຼື ເຮັດ​ວຽກ​ດ້ານ​ນີ້​ແລ້ວ​ບໍ່​ເຄີຍ​ເຈິ, ຖ້າ​ທ່ານ​ເປັນ​ຄົນ​ນຶ່ງ​ທີ່​ຍັງ​ບໍ່​ເຄີຍ​ເຈິ ກໍ​ຂໍ​ສະ​ແດງ​ຄວາມ​ຍິນ​ດີ​ນຳ ທ່ານ​ເປັນ​ນຶ່ງ​ໃນ​ລ້ານ​ແລ້ວ! ແລະກໍ​ກຽມ​ໂຕ​ເຈິ​ໄດ້​ໄວໆ​ນີ້. ເລື່ອງ ຫຼື ບັນ​ຫານີ້ (ທີ່​ໃນ​ສາຍ​ຕາ​ຄົນ​ອື່ນ​ແລ້ວ ເບິ່ງ​ຄື​ບໍ່​ແມ່ນ​ບັນ​ຫາ) ຖື​ເປັນບັນ​ຫາ​ໂລກ​ແຕກ​ທີ່​ປະ​ສົບດ້ວຍ​ຕົນ​ເອງ​​ແລ້ວ ບໍ່​ມີ​ໃຜ​ມັກ. ຝ່າຍ​ທີ່​ບໍ່​ໄດ້​ຮຽນ​ໄອ​ທີ​ອາດ​ໃຫ້​ຂໍ້​ໂຕ້​ແຍ້ງ​ມາ​ວ່າ: “ອ່າວ ເຈົ້າ​ຮຽນ​ມາ ເຈົ້າ​ກໍ​ຕ້ອງ​ໃຊ້​ອັນ​ທີ່​ຮຽນ​ແມ້, ຕ້ອງ​ໄດ້​ຮຽນ​ແປງ ຮຽນ​ເຮັດ ມັນ​ຈຶ່ງ​ເກັ່ງ ເປັນ​ການ​ເຝິກ​ຕົນ​ເອງ​ໄປ​ນຳ”, ຈຸດ​ນີ້​ຖືກ ແຕ່​ມັນ​ຖືກ​ບໍ່​ໝົດ ແນ່ນອນ​ມັນ​ກໍ​ເປັນ​ການ​ດີ​ທີ່​ເຮົາ​ໄດ້​ລອງ​ແປງ ຖ້າ​ເຮົາ​ເປັນ​ມື​ໃໝ່ ຫຼື ກຳ​ລັງ​ຕ້ອງ​ກາ​ນ​ປະ​ສົບ​ການ ແຕ່​ການ​ເຝິກ​ຝົນ ບາງ​ຄັ້ງ​ມັນ​ກໍ​ເປັນ​ຜົນ​ຕອບ​ແທນ​ທີ່​ດີບໍ່​ພຽງ​ພໍ ເພາະ​ການ​ທີ່​ແປງ​ໃຫ້ ແມ່ນ​ຖື​ວ່າ​ຜູ່​ແປງ ໄດ້​ລົງ​ທຶນ​ດ້ວຍ “ເວ​ລາ” ເຊິ່ງ​ “ເວ​ລາ” = “ເງິນ” ແລະເວົ້າ​ຮອດ​ແປງ​ຄອມ​ໃຫ້​ຄົນ​ຮູ້​ຈັກ​ແລ້ວ​ນັ້ນ ສ່ວນ​ໃຫຍ່​ມັນ​ຈະ “ຟ​ຣີ” ຫຼື ຖ້າ​ມີ​ຄ່າ​ຕອບ​ແທນ ກໍ​ເປັນ​ຈຳ​ນວນ
​ໜ້ອຍ ແລະ ໜ້ອຍຫຼາຍ (ໜ້ອຍ​ແບບ​ເຖິງ​ຂັ້ນ​ວ່າຊື້​ນ້ຳ​ເຕົາ​ຮູ້ລ້ຽງ​ຈອກ​ນຶ່ງ​ເລີຍ​ກໍ​ມີ)… ແຕ່​ຖ້າ​ເຮົາ​​ຄິດ​ໃນ​ແບບ​ດຽວ​ກັນ​ນັ້ນ ແຕ່ຫາກ​ມັນ​ເປັນວຽກ​ງານ​ສາ​ຂາ​ອື່ນ​ເດ ຈະ​ເປັນ​ແນວ​ໃດ? ​ເຊັ່ນ: ​ຮຽນ​ແປງ​ລົດ​, ຄົນ​ຮູ້​ຈັກ/ພີ່​ນ້ອງ​ເອົາ​ລົດ​ມາ​ໃຫ້​ແປງ; ຮຽນ​ເອ​ເລັກ​ໂຕ​ຣ ຄົນ​ຮູ້​ຈັກ/ພີ່​ນ້ອງ​ຫາ​ມາ​ແປງ​ໄຟ​ໃຫ້; ຮຽນ​ບໍ​ລິ​ຫານ​, ຄົນ​ຮູ້​ຈັກ/ພີ່​ນ້ອງ​ຫາ​ມາ​ບໍ​ລິ​ຫານ​ວຽກ​ໃຫ້; ຮຽນ​ການ​ຕະຫຼາດ, ຄົນ​ຮູ້​ຈັກ/ພີ່​ນ້ອງ​ຫາ​ມາ​ເຮັດ​ການ​ຕະຫຼາດ​ຂາຍ​ສິນ​ຄ້າ​ໃຫ້ ຯ​ລຯ. ຄຳ​ຕອບ​ທີ່​ຈະ​ໄດ້​ຮັບ​ກໍ​ຄື ມີ​ບາງ​ກໍ​ລະ​ນີ ​ແຕ່​ສຳ​ລັບ​ບໍ​ລິ​ຫານ, ບັນ​ຊີ ຫຼື ການ​ຕະຫຼາດ ຈະ​ບໍ່​ຄ່ອຍ​ມີ​ປານ​ໃດ ເພາະ​ໃນ​ຄວາມ​ຄິດ​ຂອງ​ຄົນ​ແມ່ນ​ວຽກ​ງານ​ປະ​ເພດ​ນີ້ ມີ​ຄວາມ​ສ່ຽງ ແລະ ​ມີຄວາມ​ລັບ​ທີ່​ບໍ່​ຢາກ​ໃຫ້​ໃຜ​ຮູ້ ແຕ່​ທີ່​ໃກ້​ຄຽງ​ກັບ​ຄອມຯ​ແມ່ນ​ແປງ​ລົດ ຫຼື ຈຳ​ພວກ​ໄຟ​ຟ້າ ແຕ່​ກໍ​ລະ​ນີ​ແນວ​ນີ້ ມັນ​ຈະ​ບໍ່​ແມ່ນ​ການ “​ຫາ” ລ້າໆ ແຕ່​ເປັນ​ການ​ “ຈ້າງ” ຫຼາຍກວ່າ ເພາະ​ເຂົາ​ໄດ້​ຄ່າ​ຕອບ​ແທນ​ເຕັມ​ອັດ​ຕາ ຫຼື ບໍ່​ກໍຫຼຸດໃຫ້​ຍ້ອນ​ຮູ້​ຈັກ​ກັນ. ແລ້ວ​ເປັນ​ຫຍັງ​ຜູ່​ທີ່​ຮຽນ​ສາ​ຂາ​ອື່ນ ຈຶ່ງ​ຖືກ​ຄົນ​ອື່ນປ​ະ​ພຶດ​ຕໍ່​ຕົນ ແຕກ​ຕ່າງ​ຈາກ​ຮຽນ​ຄອມ? ດຽວ​ຜູ່​ຂຽນ​ຈະ​ພາ​ມາ​ວິ​ເຄາະ​ເບິ່ງ​ກັນ.

Computer Science

​ເລື່ອງ​ນີ້ເຮົາ​ຕ້ອງ​ເບິ່ງ​ເລິກ​ເຂົາ​ໄປ​ເຖິງ​ແນວ​ຄິດ​ຂອງ​ຄົນ​ທົ່ວ​ໄປ ເຊິ່ງ​ໂດຍ​ສ່ວນ​ໃຫຍ່ ຫຼາຍ​ຄົນ​ຈະເຫັນ​ການ​ແປງ​ຄອມຯວ່າ​ເປັນ​ເລື່ອງ​ງ່າຍ, ບໍ່​ໄດ້​ເຮັດ​ຫຍັງຫຼາຍ, ພຽງ​ຄ​ລິກໆ​ໄປໆ​ມາໆມັນ​ກໍ​ແລ້ວ, ບໍ່​ຕ້ອງ​ອອກ​ແຮງຖ້າ​ທຽບ​ກັບ​ການ​ແປງ​ໄຟ​ຟ້າ ຫຼື ລົດ​ພາ​ຫະ​ນະ​ອື່ນໆ ແລະ​ທີ່​ຕົນ​ເອງ​ແປງ​ບໍ່​ໄດ້ ຍ້ອນ​ຕົນ​ເອງ​ບໍ່​ໄດ້​ຮຽນ, ບໍ່​ຮູ້ຊື່ໆເລີຍ​ຕ້ອງ​ຫາ​ຄົນ​ໄອ​ທີ​ແປງ​ໃຫ້ ສະ​ນັ້ນ​ແລ້ວ​ແປງ​ໃຫ້​ຟ​ຣີ​ກໍ​ໄດ້ດອກ ຫຼື ກິນ​ນ້ຳ​ກິນ​ໃນ​ກໍ​ພໍ​ແລ້ວ. ໂດຍ​ທີ່​ພວກ​ເຂົາ​ບໍ່​ໄດ້​ຄຳ​ນຶງ​ເຖິງ​ສິ່ງ​ທີ່​ເກີດ​ຂຶ້ນ​ໃນ​ສະ​ໝອງຂອງ​ຊ່າງ​ແປງວ່າ​ເຂົາ​ຕ້ອງ​ໃຊ້​ສະ​ໝອງ, ປະ​ສົບ​ການ ແລະ ເຂົ້າ​ໃຈ​ລະ​ບົບ ເພື່ອ​ວິ​ເຄາະ​ຫາຕົ້ນ​ປາຍ​ສາ​ເຫດ​ຂອງ​ບັນ​ຫາ (ຫາກວິ​ເຄາະ​ເອງ​ບໍ່​ໄດ້ ກໍ​ຕ້ອງ​ຖາມ​ອາ​ຈານ​ໃຫຍ່ Google ເສຍ​ເວ​ລາ​ກັນ​ໄປ​ອີກ), ຈະ​ເວົ້າ​ແລ້ວ​ກໍ​ຄ້າຍໆ​ກັບ​ນາຍ​ໝໍທີ່​ຄົນ​ໄຂ້​ມີ​ອາ​ກາ​ນແລ້ວ​ຕ້ອງ​ເຂົ້າ​ໃຈ​​ອາ​ການ​ຂອງໂຣກ ຈຶ່ງ​ຈະ​ລະ​ບຸ​ໂຣກ​ໄດ້ວ່າ​ເປັນ​ຫຍັງ? ແຕ່​ໝໍ​ແມ່ນ​ມີ​ຊີ​ວິດ​​ຂອງ​ຄົນ​ເຈັບ​ເຂົ້າມາ​ກ່ຽວ​ຂ້ອງ ຄົນ​ເລີຍ​ເຫັນ​ວ່າ​ມັນ​ສຳ​ຄັນ, ຍາກ ແລະ ສົມ​ຄວນ​ໄດ້​ຮັບ​ການ​ຕອບ​ແທນ​ສູງ…

tech support

ໃຜໆ​ກໍ​ເປັນ​ຊ່າງ​ແປງ​ຄອມຯ​ໄດ້ ແຕ່​ບໍ່​ແມ່ນ​ໃຜໆ​ກໍ​ຈະ​ເປັນ​ໝໍ​ໄດ້, ສະ​ນັ້ນ​ຈະ​ວ່າ​ຊ່າງ​ແປງ​ຄອມ = ໝໍ ກໍ​ບໍ່​ຖືກ, ແຕ່​ຈະ​ວ່າ ຊ່າງ​ແປ​ຄອມ < ຊ່າງ​ແປງ​ອື່ນໆ ​ນັ້ນ​ຖືກຫຼື​ບໍ່? ຄຳ​ຕອບ​ນີ້ ໃນ​ຕອນ​ນີ້​ຜູ່​ຂຽນ​ບໍ່​ສາ​ມາດ​ຕອບ​ໃຫ້​ໄດ້ ແຕ່​ຜູ່​ຂຽນ​ຢາກ​ໃຊ້​ສິ່ງ​ທີ່​ເວົ້າ​ໄປ​ກ່ອນ​ໜ້າ​ນີ້ ມາ​ຕອບ​ໃຫ້ ນັ້ນ​ກໍ​ຄື ທຸກ​ສິ່ງ​ທຸກ​ຢ່າງ​ທີ່​ເຮົາ​ເຮັດ ແມ່ນ​ຕ້ອງ​ໃຊ້ “ເວ​ລາ”, ເຊິ່ງ​ “ເວ​ລາ” = “ເງິນ”, ແລະ ເມື່ອ​ເຮົາ​ເຮັດ​ຫຍັງ​ໂດຍ​ໃຊ້​ “ເງິນ” ມັນ​ກໍ​ເທົ່າ​ກັບ​ “ການລົງ​ທຶນ” ແລະ​ ຫາກ​ “ການ​ລົງ​ທຶນ” ມັນ​ບໍ່​ໄດ້ “ເງິນ”​ ກັບ​ມາແລ້ວ​ຄົນ​ຈະ​ເຮັດ​ບໍ່? ບາງ​ຄົນ​ແມ່ນ​ເຮັດ​ນໍ້ ເພາະ​ຖ້າ​ຫາກ​ “ການ​ລົງ​ທຶນ” ໃຫ້​ຜົນ​ຕອບ​ແທນ​ບໍ່​ໄດ້​ທາງ​ເງິນ ແຕ່​ເປັນ​ທາງ “ຈິດ​ໃຈ”, “ຄວາມ​ມ່ວນ”, “ຄວາມ​ຮູ້” ແມ່ນ​ຖື​ວ່າ ການ​ລົງ​ທຶນ​ ນັ້ນ “ຄຸ້ມ” ແລະ “ບໍ່ຫຼຸດ​ທຶນ”. ເຊິ່ງ​ຜູ່​ຂຽນ​ເຊື່ອ​ວ່າ​ບໍ່​ມີ​ນັກ​ຮຽນ​ຈົບ​ຄອມຯ​ຄົນ​ໃດຢາກ​ແປງ​ຄອມ​ໃຫ້​ໃຜ​ຟ​ຣີໆ ​ເພາະ​ແປງ​ແລ້ວມັນມ່ວນ ແລະ ​​ແປງ​ຄອມ​ແລ້ວ​ໄດ້​ຄວາມ​ຮ​ູ້ ເປັນ​ການ​ລົງ​ທຶນ​ເພື່ອ​ແລກ​ເອົາ​ຄວາມ​ຮູ້ດອກ​ເນາະ, ຍິ່ງ​ໄປ​ກວ່າ​ນັ້ນ​ເວ​ລາ​ເອົາ​ມາ​ແປງແລ້ວ​ແປງ​ບໍ່​ໄດ້ກໍ​ຖືກ​ເວົ້າ​ໃຫ້​ອີກວ່າ: “ປານ​ນັ້ນ​ຮຽນ​ຄອມຯ”, ກໍ​ບໍ່​ແປກດອກ​ທີ່​ບາງ​ຄັ້ງ​ແປງ​ບໍ່​ໄດ້ ກໍ​ຍ້ອນ​ຮຽນ​ຄອມຯ​ບໍ່​ໄດ້​ຖືກ​ຫາ​ແປງ​ແຕ່​ຄອມຯ​ອີກ ບາງ​ເທື່ອ​ມີ​ຄົນ​ເອົາ iPhone, iPad ຫຼື iDontKnow ອີ່​ຫຍັງ​ທີ່​ຕົນ​ເອງ​ບໍ່​ເຄີຍ​ໃຊ້​ເລີຍ​ມາ​ໃຫ້​ແປງ​ກໍ​ມີ -_-”

ສະ​ນັ້ນ​ການ​ຈະ​ແກ້​ບັນ​ຫາ​ນີ້ ແມ່ນຢູ່​ທີ່​ພວກ​ເຮົາ​ຄົນ​ໄອ​ທີ​ນີ້​ລະ ທີ່​ຈະ​ສະ​ແດງ​ຄວາມ​ສຳ​ຄັນ​​ຂອງ​ການ​ແປງ​ຄອມ ເພື່ອ​ຍົກ​ສູງ​ລະ​ດັບ​ໃຫ້​ຄົນ​ສ່ວນ​ໃຫຍ່​ເບິ່ງ​ແລ້ວມັນ​ມີ​ຄຸນ​ຄ່າ, ບໍ່​ແມ່ນຫຍັງ​ທີ່​ເຮັດ​ໄດ້ງ່າຍໆ ແລະ ທີ່​ສຳ​ຄັນ “ຢ່າ​ໄປ​ແປງ​ໃຫ້​ເຂົາ​ຟ​ຣີໆ!” ເພາະ​ເມື່ອ​ທ່ານ​ແປງ​ໃຫ້​ໃຜ​ຟ​ຣີ​ຜູ່​ນຶ່ງ​ແລ້ວ​ນັ້ນ ຜູ່​ອື່ນໆ​ຈະ​ຕາມ​ມາ.

ຈົ່ງເຂັ້ມ​ແຂງ​ໄວ້​ພີ່​ນ້ອງ​ນັກ​ຮຽນ​ຄອມຯ​ເຮົາ!!!
………………….__
…………./´¯/‘…’/´¯¯`·¸
………./‘/…/…./……./¨¯\
……..(’(…´…´…. ¯~/‘…’)
………\……………..‘…../
……….’’…\………. _.·´
…………\…………..(