IMG_6499-660x330

ບົດຄວາມ​ນີ້ຜູ່ຂຽນຈະພາໄປທ່ຽວຊົມ​ສະ​ຖານ​ທີ່​ທ່ອງ​ທ່ຽວ​ທາງ​ທຳ​ມະ​ຊາດ​ອັນ​ງົດ​ງາມ​ອີກ​ແຫ່ງ​ນຶ່ງ​ຂອງ​ລາວ ທີ່​ຮັບ​ປະ​ກັນ​ເລີຍ​ວ່າ​ພາດ​ບໍ່​ໄດ້​ຢ່າງ​ແຮງ ເຊິ່ງ​ມັນ​ກໍ​ຄື​ “ຖ້ຳຂຸນລາງ”  ທີ່​ເປັນຖ້ຳ​ຂອງ​ຂຸນ​ລາງ ຕົວລະຄອນເອກ​ອີກນຶ່ງຕົວ​ລະ​ຄອນທີ່ສຳຄັນໃນຕຳນານໂສກ​ຄະ​ນາດ​ຕະ​ກຳ​ແຫ່ງຄວາມຮັກສາມເສົ້າທີ່ຂຶ້ນຊື່ຂອງຊາວແຂວງວຽງຈັນກໍຄືຊາວກາສີ ​ເລື່ອງ​ “ຂຸນ​ລູ​ນາງ​ອົ້​ວ” ທີ່ຜູ່​ເຖົ້າຜູ່ແກ່​ໄດ້ເລົ່າຂານໃຫ້ລູກຫຼານຟັງຕໍ່ໆກັນມາ.

ຕາມ​ການ​ເລົ່າ​ຂານ​​ຂອງຜູ່​ເຖົ້າ​ຜູ່​ແກ່ ບໍລິ​ເວນ​ຖຳ້​ແຫ່ງ​ນີ້ເປັນໄຮ່ນາ, ​ເປັນ​ສະຖານ​ທີ່​ພັກຜ່ອນ, ບ່ອນ​ເກັບ​ມ້ຽນຊັບ​ສົມບັດຂອງ ຂຸນລາງ (ເສດຖີແຫ່ງນະຄອນກາຍໃນສະໄໝນັ້ນ) ແລະ ໃນ​ປັດ​ຈຸ​ບັນ​ແມ່ນ​ສະ​ຖານ​ທີ່​ທ່ອງ​ທ່ຽວ​ທາງ​ທຳ​ມະ​ຊາດ​ທີ່​ອຸ​ດົມ​ສົມ​ບູນ ແລະ ງົດ​ງາມ​ສຸດໆ, ຖ້ຳຂຸນລາງແຫ່ງ​ນີ້ ຍັງ​ມີອີກຊື່ນຶ່ງທີ່ຊາວເມືອງກາສີຮຽກຂານກັນ​ ກໍແມ່ນ “ຖ້ຳຫິນຂັນໝາກ” ທີ່​ຊາວ​ເມືອງ​ພາ​ກັນ​ເອີ້ນ​ຊື່​ນີ້ ກໍເພາະວ່າພາຍໃນຖ້ຳມີຫິນເປັນຮູບໝາກເບັງໃຫຍ່ ເຊິ່ງໝາກເບັງນີ້ເພິ່ນບອກວ່າເປັນໝາກເບັງຂັນໝາກທີ່ຂຸນລາງຈະນຳໄປສູ່ຂໍນາງອົ້ວ ແຕ່ນາງອົ້ວພັດຂ້າໂຕຕາຍໜີ​ຂັນ​ໝາກ​ຂອງ​ຂຸນ​ລາງສາກ່ອນ ເຮັດ​ໃຫ້​ຂຸນ​ລາງ​ກາຍ​ເປັນ​ໝ້າຍ​ຂັນ​ໝາກ ຂຸນ​ລາງ​ເພິ່ນ​ເລີຍ​ປະ​ໄວ້​ແນວນັ້ນ​ຈົນ​ກາຍ​ເປັນ​ຫິນ ແລະ ພາຍໃນຖ້ຳກໍມີຜົ້ງ​ທັງໝົດເຈັດຜົ້ງ ທີ່ບາງບ່ອນເບິ່ງຄ້າຍຄືເປັນຫ້ອງໂຖງຮັບແຂກ, ຫ້ອງນອນທີ່ມີຕຽງນອນ, ຜ້າກັ້ງຕາມຈິນຕະນາການ​ຂອງ​ເຮົາ ແລະ ຄຳບອກເລົ່າຂອງຜູ່ນຳທ່ຽວ.

DSC-0000348

ຄວາມ​ງາມ​ຂອງ​ຖ້ຳ​ແຫ່ງ​ນີ້​ຍັງ​ມີ​ຕໍ່ ເຊິ່ງຄວາມພິເສດອີກ​ຢ່າງ​ທີ່​ພາດ​ບໍ່​ໄດ້​ເດັດ​ຂາດຂອງຖ້ຳນີ້ ແມ່ນເປັນຖ້ຳທີ່ມີນ້ຳຍ້ອຍອອກມາຈາກຜາ ແຖມພາຍໃນຖ້ຳຍັງມີຫິນນ້ຳຍ້ອຍອີກດ້ວຍ ເຮັດໃຫ້ພາຍໃນຖ້ຳເບິ່ງຄືດິນແດນ​ອັດ​ສະ​ຈັນທີ່ສວຍງາມ ຖືກປະດັບເອ້ໄວ້ດ້ວຍ​ເພັດ​ນິນ​ຈິນ​ດາທີ່ເຫຼື້ອມ​ລະ​ຍິບ​ລະ​ຍັບ ແຕ່​ໜ້າ​ເສຍ​ດາຍ​ທີ່​ຜູ່ຂຽນ​ບໍ່​ສາ​ມາດ​ເກັບ​ຮູບ​​ຄວາມ​ງາມ​ອະ​ລັງ​ການ​ຂອງທາງ​ໃນ​ຖ້ຳ​ມາ​ຝາກ ເພາະ​ຂ້າງ​ໃນ​ມັນ​ມືດ​ ເຖິງ​ແມ່ນ​ຈະ​ມີ​ດອກ​ໄຟ​ທີ່​ໄດ້​ຮັບ​ໄຟ​ຈາກ​ເຄື່ອງ​ປັ່ນ​ໄຟ ແຕ່​ກໍ​ບໍ່​ແຈ້ງ​ພໍ​ຈະ​ໃຫ້​ຜູ່​ຂຽນ​ຖ່າຍ​ຮູບ​ໄດ້​ຢ່າງ​ຈະ​ແຈ້ງ (ບໍ່​ຢາກບອກວ່າ​ເທັກ​ນິກ​ການ​ຖ່າຍ​ຮູບ​ຢູ່​ໃນ​ຂັ້ນ​ນ້ອງ​ຂອງ​ອະ​ນຸ​ບານ​ອີກ)  ແລະ ເພິ່ນ​ກໍມີຂໍ້ຫ້າມສິ່ງ​ນຶ່ງທີ່ບອກຕໍ່ໆກັນມາວ່າຫ້າມນຳເອົາສິ່ງທີ່ຢູ່ພາຍໃນຖ້ຳອອກມາເດັດຂາດ (ອັນນີ້ຜູ່ຂຽນກະບໍ່ກ້າພິສູດຄືກັນ​ວ່າ​ມັນ​ຊິ​ເກີດ​ຫຍັງ​ຂຶ້ນ).

ພິເສດອີກສິ່ງນຶ່ງທີ່​ພາດ​ບໍ່​ໄດ້ ກໍແມ່ນທຳ​ມະ​ຊາດ​ອັນ​ອຸ​ດົມ​ສົມ​ບູນ​ທີ່​ຢູ່​ພາຍນອກ​ຖ້ຳ​ແຫ່ງ​ນີ້ ຈາກ​ທາງ​ເຂົ້າ​ທີ່​ເປັນ​ປະ​ຕູ​ໃຫຍ່ໄປ​ຈົນ​ຮອດ​ທາງ​ເຂົ້າ​ຖ້ຳ ແມ່ນມີປ່າໄມ້ທີ່ຂຽວງາມ ແລະ ຊຸ່ມຊື່ນຢູ່ຕະຫຼອດເວລາ ແຖມຍັງມີນ້ຳໂຕນຕາດສອງສາຍທີ່ມາບັນຈົບກັນຢູ່ທີ່ທາງຈະຂຶ້ນໄປປາກຖ້ຳ ຊື່​ວ່າ “ນ້ຳ​ຫ້ວຍ​ຕາດ”

DSC-0000350

ແລະ ເຮົາ​ຍັງ​ສາ​ມາດ​ລົງ​ຫລິ້ນ​ນ້ຳ​ຕົກ​ນັ້ນ​ໄດ້​ດ້ວຍ ຂໍ​ບອກວ່າ​ນ້ຳ​ເຢັນ​ຊື່ນ​ໃຈ​ສຸດໆ ແລະ ຄ່າ​ຜ່ານ​ປະ​ຕູ​ໃຫຍ່ ບອກ​ເລີຍ​ວ່າ​ຖືກ​ໄດ້​ໃຈ​ອີ່ຫຼີ ເພາະ​ຖ້າ​ທຽບ​ຄ່າ​ຜ່ານ​ປະ​ຕູ ກັບ​ໄດ້​ສຳ​ຜັດ​ກັບ​ຄວາມ​ງາມ​ຂອງ​ທຳ​ມະ​ຊາດ​ລະ​ດັບ​ນີ້ ປານ​ວ່າ​ໄດ້​ເຂົ້າ​ຟ​ຣີ​ພຸ້ນ​ລະ (ຖ້າ​ຢາກ​ຮູ້​ວ່າ​ລະ​ດັບ​ໃດ​ຕ້ອງ​ໄປ​ສຳ​ຜັດ​ເອງແລ້ວ​ຈະ​ບໍ່​ຜິດ​ຫວັງ).

ສຳ​ລັບ​ທາງ​ໄປ​ກໍ​ບໍ່​ຍາກ ເພາະຖ້ຳ​ຂຸນ​ລາງ​ແຫ່ງ​ນີ້ ຢູ່​ໃນ​ເຂດ​ປ່າ​ສະ​ຫງວນ​ຂອງ​ເມືອງ​ກາ​ສີ ຢູ່​ບ້ານ​ຫ້​ວຍສານ ເມືອງ​ກາ​ສີ ແຂວງວຽງ​ຈັນ ຫ່າງ​ຈາກ​ເທ​ດສະ​ບານ​ເມືອງ​ໄປ​ທາງ​ທິດ​ຕາ​ເວັນ​ອອກ​ສ່ຽງ​ເໜ​ືອ ປະ​ມານ 18 ກິ​ໂລ​ແມັດ.

Khoun Lang Cave Map

ແຖມ 3 ຮູບພາບດ້ານໃນຖ້ຳ ຈາກ ທ່ານ  Thipphakone  Manivong

_TUM4952

_TUM4969

_TUM4935

ເບິ່ງຮູບ ເພີ່ມເຕີມຈາກທີມງານ ວາລະສານຮູບໄດ້ທີ່ http://issuu.com/laophotomag/docs/lpm-issue5_issuu/16

DSC-0000353ແລະນີ້ ເປັນທາງຂື່ນສູ່ຖ້ຳ ກ່ອນ​ຈະ​ເຫັນ​ຄວາມ​ງາມ​ຂອງ​ຖ້ຳ ກໍຕ້ອງ​ຜ່ານ​ບົດ​ພິ​ສູດ​ນີ້​ໃຫ້​ໄດ້ (ຍ່າງ​ຈົນ​ເມື່ອຍ​ພຸ້ນ​ລະ)

ຂໍ​ຝາກ​ຖິ້ມ​ທ້າຍ​ອີກ​ຢ່າງ​ໜຶ່ງ ກ່ອນ​ຈະ​ໄປ​ທ່ຽວ​ປະ​ເທດ​ອື່ນ ລອງ​ທ່ຽວ​ເມືອງ​ລາວ​ໃຫ້​ໄຂວ່ກ່ອນ ກ່ອນ​ຈະ​ໄປ​ທ່ຽວ​ຕ່າງ​ປະ​ເທດ ໂດຍ​ສະ​ເພາະ​ແຫຼ່ງ​ທ່ອງ​ທ່ຽວ​ທາງ​ທຳ​ມະ​ຊາດ ​ແລ້ວ​ຈະ​ບອກ​ໄດ້​ໂລດ​ວ່າ ທຳ​ມະ​ຊາດ​ບ້ານ​ເຮົາ​ນີ້​ລະ ສຸດຍອດ​ແລ້ວ!