Laos_Construction

ເມື່ອ​ປະ​ເທດ​ພັດ​ທະ​ນາ ແນ່ນອນ​ຍ່ອມ​ມາ​ພ້ອມ​ກັບ​ການ​ກໍ່​ສ້າງ ແລະ​ໃນ​ປັດ​ຈຸ​ບັນ​ບ້ານ​ເຮົາ​ກໍ​ເລີ່ມ​ມີ​ການ​ກໍ່​ສ້າງ​ຕຶກ​ສູງ​ຫຼາຍ​ສິບໆ​ຊັ້ນ ສະ​ນັ້ນ​ແລ້ວ​ຈຶ່ງ​ມີ​ການ​ນຳ​ໃຊ້​ເຄ​ນ ຫຼື Tower crane ສຳ​ລັບ​ການ​ກໍ່​ສ້າ​ງ​ຕຶກ​ສູງ​ນັ້ນ​ເຂົ້າ​ມາ ກໍ່​ໃຫ້​ເກີດ​ຂໍ້​ສົງ​ໄສ​ເຖິງ​ຄວາມ​ປອດ​ໄພ​ຂອງ​ເຄື່ອງ​ນີ້ ໂດຍ​ສະ​ເພາະ​ແມ່ນ​ຢູ່​ທີ່​ຈຸດ​ເຄື່ອງ​​ຖ່ວງນ້ຳ​ໜັກ (Counter Weight) ທີ່​ໃຊ້​ຊີ​ມັງ​ນັ້ນ, ຫຼາຍ​ຄົນ​ກໍ​ຄິດ​ວ່າ​ມັນ​ບໍ່​ເໝາະ​ສົມບໍ່? ມັນ​ຈະ​ຕົກ​ລົງ​ມາ​ບໍ່? ມັນ​ແມ່ນ​ແນວ​ນັ້ນ​ແທ້​ບໍ່? ຄຳ​ຕອ​ບ​​ຂອງ​ທ່ານ​ມາ​ຮອດ​ແລ້ວ.

ໝາຍ​ເຫດ: ກ່ອນ​ອື່ນ​ກໍ​ຕ້ອງບອກກ​່ອນ​ວ່າ​ຜູ່​ຂຽນ​ກໍ​ບໍ່​ແມ່ນ​ນັກ​ຮຽນ​ກໍ່​ສ້າງ ຫຼື ມີ​ປະ​ສົບ​ການ​ໃດໆ ແຕ່​ແມ່ນ​ຄວາມ​ຮູ້​ທີ່​ໄດ້​ມາ​ຈາກ​ການ​ຫາ​ຂໍ້​ມູນ​ເພື່ອ​ມາ​ໄຂ​ຂໍ້​ສົງ​ໄສ​ນີ້​ໃຫ້ຫຼາຍໆ​ທ່ານ​ໄດ້​ຮັບ​ຮູ້ນຳ​ກັນ.

ສຳ​ລັບ​ການ​ໃຊ້​ຊີ​ມັງຖ່ວງ​ນ້ຳ​ໜັກ​ໃນ​ເຄນ​ກໍ່​ສ້າງ​ຕຶກ​ສູງ​ນີ້ແມ່ນ​ຖື​ວ່າ​ເປັນ​ເລື່ອງ​ປົກ​ກະ​ຕິ ເຊິ່ງ​ພວກ​ເຮົາ​ສາ​ມາດ​ເຫັນ​ໄດ້​ໃນ​ການ​ນຳ​ໃຊ້​ໃນຫຼາຍ​ປະ​ເທດ​ກໍ​ເຮັດ​ແນວ​ນີ້​ຄື​ກັນດັ່ງ​ຮູບ​ດ້ານ​ລຸ່ມ (ຜູ່ຂຽນ​ເອງ​ກໍ​ເຄີຍ​ເຫັນ​ການ​ກໍ່​ສ້າງ​ໃນຫຼາຍໆ​ປະ​ເທດ​ກໍ​ແມ່ນ​ເຮັດ​ຄື​ກັນ)

crane_web

IM000465.JPG

ເຊິ່ງ​​ຈຳ​ນວນ​ຂອງ​ຊີ​ມັງ​ນັ້ນ​ຈະຫຼາຍ​ໜ້ອຍ​ກໍ​ຂຶ້ນ​ກັບ​ຄວາມ​ຍາວ​ຂອງ​ອີກ​ເບື້ອງ ເພື່ອ​ໃຫ້​ນ້ຳ​ໜັກ​ມັນ​ສົມ​ດຸນ​ກັນ​ຈຶ່ງ​ຈະ​ບໍ່​ລົ້ມ​ ຫຼື ງ່ຽງ. ສະ​ນັ້ນ​ເລື່ອງ​ທີ່ຫຼາຍ​ທ່ານ​ຢ້ານ​ວ່າ​ມັນ​ຈະ​ຕົກ​ລົງ​ມາ ກໍ​ຄິດ​ວ່າ​ມັນ​ມີ​ມາດ​ຕະ​ຖານ​ຮອງ​ຮັບ​ມາ​ກ່ອນ​ແລ້ວ​ຢ່າງ​ແນ່ນອນ ກ່ອນ​ທີ່​ຈະ​ນຳ​ອຸ​ປະ​ກອນ​ກໍ່​ສ້າງ​ນີ້​ອອກ​ມາ​ຈຳ​ໜ່າຍ​ໃຫ້​ໃຊ້​ໃນ​ການ​ກໍ່​ສ້າງ​ນໍ້, ຖ້າ​ຫາກ​ຊີ​ມັງ​ຖ່ວງ​ໜັກ​ນີ້​ເກີດ​ຕົກ​ລົງ​ມາ ມັນ​ກໍ​ບໍ່​ແມ່ນ​ແຕ່​ຄວາມ​ປອດ​ໄພ​ຂອງ​ບຸກ​ຄົນ​ທົ່ວ​ໄປ, ພະ​ນັກ​ງານ​ກໍ່​ສ້າງ​​ເທົ່າ​ນັ້ນ​ທີ່​ຈະ​ຖືກ​ຜົນ​ກະ​ທົບ ຍິ່ງ​ໄປ​ກວ່າ​ນັ້ນ​ມັນ​ກໍ​ອາດ​ຈະ​ເຮັດ​ໃຫ້ Tower Crane ນີ້​ຂາດ​ສົມ​ດຸນ ແລະ​ລົ້ມ​ລົງ​ໄປ​ຖືກ​ສິ່ງ​ກໍ່​ສ້າງອື່ນໆ​ນຳ​ອີກ ດັ່ງ​ນັ້ນ​ຄວາມ​ເສຍ​ຫາຍ​ຫາກ​ຊີ​ມັງ​ຕົກ​ລົງ​ນັ້ນ​ເປັນ​ໄປ​ບໍ່​ໄດ້​ທີ່​ທີມ​ງານ​ກໍ່​ສ້າງ​ຈະ​ຖື​ເບົາ​ໄດ້​ງ່າຍໆ. ຈຶ່ງ​ບໍ່​ຢາກ​ໃຫ້​ເປັນ​ຫ່ວງວ່າ​ມັນ​ຈະ​ຕົກ​ລົງ​ມາ​ໄດ້​ງ່າຍ ຫຼື ມັນ​ບໍ່​ແມ່ນ​ເລື່ອງ​ປົກ​ກະ​ຕິ ເພາະ​ການ​ໃຊ້​ແທ່ງ​ຊີ​ມັງ​ເພື່ອ​ຖ່ວງໜັກ​ນັ້ນ​ແມ່ນ​ວິ​ທີ​ນຳ​ໃຊ້​ຂອ​ງ​ມັນ​ຢູ່​ແລ້ວ ເຊິ່ງ​ມີ​ອະ​ທິ​ບາຍ​ການ​ປະ​ກອບ ແລະ ສະ​ລີ​ລະ​ຂອງ Tower Crane ​ຢູ່​ຮູບ​ດ້ານ​ລຸ່ມ.

Crane Design3

ວິດີໂອການ​ເອົາ​ຊີ​ມັງ​ຖ່ວງ​ນ້ຳ​ໜັກ​ອອກ​ຈາກ Tower Crane

ສຸດ​ທ້າຍ​ແລ້ວ​ກໍ​ຖື​ເປ​ັນ​ເລື່ອງ​ດີ​ທີ່​ມີ​ຄົນ​ສົງ​ໄສ ແລະ ເປັນ​ຫ່ວງ​ໃນ​ປະ​ເດັນ​ນີ້, ແຕ່​ເມື່ອ​ເຮົາ​ສົງ​ໄສ ເຮົາ​ກໍ​ຄວນ​ຫາ​ຄຳ​ຕອບ​ໃຫ້​ຂໍ້​ສົງ​ໄສ​ນັ້ນ​ນໍ້ ບໍ່​ແມ່ນການ​ທີ່​ປະ​ຊາ​ເນັດ​ຈຳ​ນວນ​ນຶ່ງ​ບໍ່​ຮູ້​ແທ້​ແລ້ວ​ແຕກ​ຕື່ນ​ໄປ​ຕໍ່​ວ່າ: ວ່າ​ເຮັດ​ບໍ່​ຖືກ​ຕ້ອງ, ເຮັດ​ບໍ່​ໄດ້​ມາດ​ຕະ​ຖານ, ມັນ​ສິ​ຕົກ​ຖື​ກ​ຫົວ​ຕາຍ, ເວ​ລາ​ຂີ່​ລົດ​ກາຍ​ຮີບ​ເລັງ​ໄວໆ​ຢ້ານ​ມັນ​ຕົກ, ​ແລ້ວ​ກໍ​ລາມ​ໄປ​ຮອດ​ເວົ້າ​ວ່າ​ພາກ​ສ່ວນ​ທີ່​ກ່ຽວ​ຂ້ອງ​ບໍ່​ເອົາ​ໃຈ​ໃສ ຯ​ລຯ. ອັນ​ນີ້​ຜູ່​ຂຽນ​ຄຶດ​ວ່າ​ມັນ​ຄື​ການ​ແຕກ​ຕື່ນ​ທີ່​ສ້າງ​​ແຕ່ຜົນ​ລົບ ແລະຊ່ວຍ​ຫາ​ທາງ​ແກ້​ຫຍັງ​ບໍ່​ໄດ້, ເມື່ອ​ເຮົາ​ມີ​ຄົນ​ຍົກ​ຂໍ້​ສົງ​ໄສ ຫຼື ຕັ້ງ​ຄຳ​ຖາມ ເຮົາ​ຄວນ​ພາ​ກັນ​ຄິດ​ ແລະ ຊອກຫາ​ຄຳ​ຕອບ​ໃຫ້​ໝັ້ນ​ໃຈ​ກ່ອນ​ວ່າ​ມັນ​ແມ່ນ​ແນວ​ໃດ​ແທ້ ກ່ອນ​ທີ່​ພວກ​ເຮົາ​ຈະ​ອອກ​ຄຳ​ຄິດ​ຄຳ​ເຫັນ ຫຼື ຖ້າ​ທ່ານ​ໃດ​ບໍ່​ຢາກ​ຊອກ​ຫາ​ຄຳ​ຕອບ ກໍ​ສາ​ມາດ​ຖາມ​ກັນ​ເຂົ້າ​ມາ​ທາງ e-Corner ໄດ້​ຕະ​ຫຼອດ​ເວ​ລາ ພວກ​ເຮົາ​ພ້ອມ​ທີ່​ຈະ​ເປັນ​ຄົນ​ຊ່ວຍ​ຊີ້​ແຈງ​ບັນ​ຫາ​ໃຫ້​ທ່ານ​ສະ​ເໝີ​ນໍ້. ຂໍ​ສະ​ໜັບ​ສະ​ໜຸນ​ໃຫ້​ພວກ​ເຮົາ​ຮູ້​ຄິດ​ກ່ອນ​ຈະ​ເວົ້າ, ກ່ອ​ນ​ຕັດ​ສິນ, ຄວາມ​ສະ​ອາດ​ ແລະ ຄວາມ​ສະ​ຫງົບ​ສຸກຂອງ​ສັງ​ຄົມ​ອອນ​ລາຍຂຶ້ນ​ຢູ່​ກັບ​ພວກ​ເຮົາ​ທຸກ​ຄົນ.