Ice Bucket Challengeເນື່ອງຈາກກະແສມາຮອດລາວແລ້ວ (ຈັກໃຜພາເຮັດ ຮະຮະ) ແລະຫຼາຍຄົນກໍຍັງບໍ່ເຂົ້າໃຈໃນເລື່ອງນີ້. ໂດຍສະເພາະສ່ວນໃຫຍ່ແມ່ນຖາມວ່າ: ເຮັດເພື່ອຫຍັງ? ແລ້ວເຂົາໄດ້ຫຍັງຈາກທີ່ເຮົາເຮັດອັນນີ້? ຫຼືເວົ້າໃນແນວບໍ່ພໍໃຈວ່າ ເຮັດນຳແນວຕາເວັນຕົກ, ເຮັດເປືອງນ້ຳ ຯລຯ. ຈະ​ມາ​ຊີ້​ແຈງ​ໃຫ້​ຮູ້​ກັນ​ນະ​ບັດ​ນີ້.
ໂດຍ​ການ​ຫົດ​ຄຸ​ນ້ຳ​ກ້ອນ​ນີ້ ແມ່ນ​ແຄມ​ເປນ​ຂອງ ALS ເຊິ່ງ​ມີ​ຊື່​ແຄມ​ເປນ​ວ່າ: ALS Ice Bucket Challenge. ເຊິ່ງ​ເປັນ​ແຄມ​ເປນ​ເພື່ອ​ສ້າງ​ການ​ຕື່ນ​ຕົວ ແລະ ໃຫ້​ຄົນ​ໄດ້​ຮູ້​ເຖິງ​ໂຣດ ALS ທີ່​ຮ້າຍ​ແຮງ​ນີ້.
ໂດຍ​ມີ​ກົດ​ລະ​ບຽບ​ທີ່​ວ່າ ຄົນ​ທີ່​ຮ່ວມ​ແຄມ​ເປນ​ນີ້ ຕ້ອງ​ເຮັດ​ການ​ຫົດ​ຄຸ​ນ້ຳ​ກ້ອນ​ດັ່ງ​ກ່າວ ແລ້ວ​ບໍ​ລິ​ຈາກ​ເງິນ $10 ຫຼື ຈະ​ເຮັດ​ແຕ່​ການ​ຫົດ​ບໍ່​ບໍ​ລິ​ຈາກ​ເງິນ​ກໍ​ໄດ້ ໂດຍ​ມີ​ເງື່ອນ​ໄຂ​ໃຫ້​ໃສ່ hashtag ວ່າ #ALSicebucketchallenge ຫຼື #Icebucketchallenge ແລ​້ວ​ຄົນ​ທີ່​ເຮັດ​ມີ​ສິດ​ສະ​ເໜີ​ຊື່ ຫຼື ທ້າ​ຄົນ​ອື່ນ​ຕໍ່​ໄດ້ 3 ຄົນ, ເພື່ອ​ໃຫ້​ເຂົາ​ຮັບ​ຄຳ​ທ້າ ຫຼື ຖ້າ​ບໍ່​ເຮັດ​ແມ່ນ​ຕ້ອງ​ບໍ​ລິ​ຈາກ​ເງິນ $100 ​ໃຫ້​ແຄມ​ເປນ​ຂອງ ALS ໂດຍ​ທັນ​ທີ່ (ສາ​ມາດ​ບໍ​ລິ​ຈາກ​ອອນ​ລາຍ​ໄດ້​ທີ່ alsa.org)

ມາ​ຮອດ​ນີ້​ເຫັນ​ກັນ​ແລ້ວ​ວ່າ​ເຂົາ​ໄດ້​ຫຍັງ? ສິ່​ງ​ທີ່​ເຂົາ​ໄດ້​ຢ່າງ​ເຮັດ​ໄດ້​ຊັດ​ເຈນຄື​ເງິນ​ບໍ​ລິ​ຈາກ ຈາກ​ຜູ່​ທີ່​ຮັບ​ຄຳ​ທ້າ ແລະ ບໍ່​ຮັບ​ຄຳ​ທ້າ. ​ແຕ່​ສິ່ງ​ທີ່ຫຼາຍ​ທ່ານ​ບໍ່​ຮູ້​ນັ້ນຄື​ຜົນ​ໄດ້​ຮັບ​ທາງ​ອ້ອມ, ທີ່​ຜູ່​ໃດທີ່​ບໍ່​ບໍ​ລິ​ຈາກ​ກໍ​ໄດ້​ສ້າງ​ຜົນ​ໄດ້​ຮັບ​ນີ້​ເຊັ່ນ​ກັນ ນັ້ນ​ກໍ​ຄື​ເຂົາ​ກໍ​ໄດ້​ສ້າງ​ກະ​ແສ ຫຼື ເຜີຍ​ແພ່​ເລື່ອງ​ແຄມ​ເປນ ALS ນີ້​ໃຫ້​ຄົນ​ອື່ນໆ​ຮູ້​ຕໍ່. ແນ່ນອນ​ເມື່ອ​ຄົນ​ເຫັນ​ວິ​ດີ​ໂອ ຕ້ອງ​ມີ​ແນ່ນອນ​ທີ່​ຄົນ​ຈະ​ໄປ​ຊອກ​ໃນ​ອິນ​ເຕີ​ເນັດ​ວ່າ ALS Ice Bucket Challenge ນີ້​ແມ່ນ​ຫຍັງ? ຍິ່ງ​ເຫັນ​ຄົນ​ເຮັດຫຼາຍ ຄົນ​ກໍ​ຍິ່ງ​ສົງ​ໄສຫຼາຍ, ແລະ​ເມື່ອ 1 ຄົນ​ສາ​ມາດ​ທ້າ​ໄດ້​ຕໍ່ 3 ຄົນ, ການ​ແພ່​ກິ່ງ​ງ່າ​ຍິ່ງ​ສູງ​ປານ​ຈົດ​ໝາຍ​ລູກ​ໂສ້​ພຸ້ນ​ລະ. ມາ​ຮອດ​ນີ້​ກັບ​ຄືນ​ໄປ​ເບິ່​ງວ່າ​ຈຸດ​ປະ​ສົງ​ຂອງ​ແຄມ​ເປນ​ນີ້​ແມ່ນ​ຫຍັງ? ເຊິ່ງ​ມັນ​ແມ່ນ “​ເພື່ອ​ສ້າງ​ການ​ຕື່ນ​ຕົວ ແລະ ໃຫ້​ຄົນ​ໄດ້​ຮູ້​ເຖິງ​ໂຣດ ALS ທີ່​ຮ້າຍ​ແຮງ​ນີ້”. ເຫັນ​ບໍ່?

Why Ice Bucket Challenge

ນັ້ນລະ​ແມ່ນ​ຈຸດ​ປະ​ສົງ​ທີ່​ທາງ ALS ໃນ​ແຄມ​ເປນ​​ຫົດ​ຄຸ​ນ້ຳນີ້. ການໃຫ້​ຄົນ​ຮັບ​ຮູ້ນັ້ນ​ແມ່ນ​ເປົ້າ​ໝາຍຫຼັກ​ຂອງ​ແຄມ​ເປນ ສົ່ງຜົນ​ໃຫ້​ຍິ່ງ​ຄົນ​ຮູ​້​ຈັກ​ແຄມ​ເປນ​ນີ້ຫຼາຍ, ເຮັດຫຼາຍ, ໂອ​ກາດ​ທີ່​ຄົນ​ຈະ​ບໍ​ລິ​ຈາກ​ກໍ​ຍິ່ງ​ສູງ​ຂຶ້ນ. ​ໃນ​ປີ້​ນີ້ ແຄມ​ເປນ​ນີ້ສ້າງ​ເງິນ​ໄດ້​ສູງ​ເຖິງ $31.5 ລ້ານ ໄປ​ແລ້ວ, ເຊິ່ງຫຼາຍກວ່າ​ປີ​ກາຍ​ເຖິງ 16 ທົບ. ເງິນ​ບໍ​ລິ​ຈາກທີ່​ໄດ້​ຮັບ​ມາ​ຈະ​ນຳ​ໄປ​ຊ່ວຍ​ເຫຼືອ​ການ​ຄົ້ນ​ຄວ້າ​ຫາ​ທາງ​ປິ່ນ​ປົວ​ໂຣກ​ນີ້ ນອກ​ນັ້ນ​ຍັງ​ນຳ​ໄປ​ຊ່ວຍ​ເຫຼືອ​ຜູ່​ທີ່​ປິ່ນ​ປົວ​ໂຣກ​ນີ້​ຢູ່ ເຊິ່ງ​ຮູ້​ຈັກ​ໃນ​ອີກ​ຊື່​ນຶ່ງ​ຄື: ໂຣກ Lou Gehrig.

ສະຫຼຸບ​ແລ້ວ ການ​ທີ່​ຄົນ​ເຮັດ​ຫົດ​ຄຸ​ນ້ຳ​ກ້ອນ​ນີ້ ກໍ​ຖື​ວ່າ​ຊ່ອຍ​ແຄມ​ເປນ​ນີ້​ບໍ່​ທາງ​ກົງ​ກໍ​ທາງ​ອ້ອມ, ສະ​ນັ້​ນ​ເວ​ລາ​ເຮັດກໍ​ຢ່າ​ລືມ​ເວົ້າ​ເຖິງ​ແຄມ​ເປນ​ນີ້ ຫຼື ຢ່າງ​ໜ້ອຍ​ກໍ​ໃຫ້​ເວົ້າ​ຊື່ ALS Ice Bucket Challenge ໃນ​ວິ​ດີ​ໂອ ຫຼື ໃສ່​ຊື່​ວິ​ດີ​ໂອ​ວ່າ Ice Bucket Challenge ນຳ​ແດ່​ເດີ້. ເພື່ອ​ທີ່​ມັນ​ຈະ​ໄດ້​ເປັນ​ການ​ເຮັດ​ທີ່​ມີ​ປະ​ໂຫຍດ​ແທ້ໆ ເພາະ​ຖ້າ​ເຮັດ​ຫົດ​ແລ້ວ ບໍ່​ເວົ້າ​ເຖິງວ່າ​ຫົດ​ໃນ​ນາມ Ice Bucket Challenge ແຕ່​ຫົດຫຼິ້ນ​ຫົດ​ຫົວ ແລ້ວ​ທ້າ​ກັນ​ຕໍ່ໆ​ໄປ​ຊື່ໆ ຫຼື ໄປ​ປ່ຽນ​ຊື່​ວ່າ​ຫົດ​ຄຸນ້ຳ​ກ້ອນ ຫຼື ອີ່​ຫຍັງ​ກໍ​ວ່າ​ໄປ ມັນ​ກໍ​ບໍ່​ໄດ້​ຫຍັງ, ແລ້ວ​ກໍ​ຈະ​ຕົກ​ເປັນ​ເລື່ອງ ເຫີ່​ຕາມ​ກະ​ແສ​ຕາ​ເວັນ​ຕົກ, ເປືອງ​ນ້ຳ ຯ​ລຯ ດ​ັ່ງທີ່​ຄົນ​ອື່ນ​ເວົ້າ​ໃຫ້​ນັ້ນ​ລະ. ເມື່ອ​ຢາກ​ເຮັດ​ໃຫ້​ຄື​ເພິ່ນ ຕ້ອງ​ເຮັດ​ໃຫ້​ຄື​ເພິ່ນ, ຖືກ​ທ້າ​ບໍ່​ເຮັດ ກໍ​ຢ່າ​ລືມ​ບໍ​ລິ​ຈາກ $100 ຫຼື ຕາມ​ຄວາມ​ອາດ​ສາ​ມາດ​ເນາະ.

ຄຳ​ຖາມ​ທີ່​ຂໍ​ຊີ້​ແຈງ
ມີ​ບາງ​ທ່ານ​ທີ່​ສະ​ແດງ​ຄວາມ​ບໍ່​ພໍ​ໃຈ​ຕໍ່​ກະ​ແສ​ນີ້​ຖາມ​ໃນ​ສັງ​ຄົມ​ອອນ​ລາຍ​ວ່າ:

ຖາມ: ເປັນ​ຫຍັງ​ຕ້ອງ​ເຮັດ​ຄື​ເຂົາ, ຄື​ບໍ່​ທ້າ​ກັນ​ແນວ​ອື່ນ ຈຶ່​ງ​ບໍ່​ໄປ​ລອກ​ເຂົ​າ​ເຈົ້າ? ເຊັ່ນ: ໄປ​ໂດດ​ຈ້ອງ, ປີ້ນຫຼັງ​ກາ, ຫົດ​ນ້ຳ​ຮ້ອນ (ອັນ​ນີ້​ມັນ​ລວກ ແລ້ວ​ເຈັບ, ໂພງ​ອີກ​ເນາະ ເຂົາ​ແຫ່ງ​ສິ​ເວົ້າ​ໃຫ້ ສົມ​ນ້ຳ​ໜ້າ​ພ້ອມ ຮະ​ຮະ).
ຕອບ: ຂໍ້​ນີ້​ຕອບ​ໄດ້​ງ່າຍໆ​ເລີຍ​ວ່າ, ຖ້າ​​ເຮັດ​ອັນ​ຍາກ ຄົນ​ອື່ນ​ກໍ​ເຮັດ​ຕໍ່​ຍາກ ຢ່າ​ລືມ​ວ່າ​ຈຸດ​ປະ​ສົງຫຼັກ​ຂອງ​ການ​ເຮັດ​ແຄມ​ເປນ​ລັກ​ສະ​ນະ​ນີ້​ຄື “ການ​ກະ​ຈາຍ” ແລະ “ການ​ເຜີຍ​ແພ່”.

ຖາມ: ຕໍ່​ມາ​ເປັນ​ຫຍັງ​ຈຶ່ງ​ເຮັດ​ຄື​ເຂົາ​ເຈົ້າ?
ຕອບ: ເຫດ​ຜົນ​ກໍ​ຄື ເຮັດ​ເພື່ອ​ສະ​ໜັບ​ສະ​ໜຸນ​ແຄມ​ເປນ ALS ນີ້ນັ້ນ​ລະ, ແຕ່​ຖ້າ​ມື້​ນຶ່ງ​ບ້ານ​ເຮົາ​ມີ​ແຄມ​ເປນ​ໄອ​ເດຍ​ດີ​ແນວ​ນີ້ ແນ່ນອນ​ເມື່ອ​ມັນ​ດັງ ຄົນ​ອື່ນ​ເຂົາ​ກໍ​ຈະ​ເຮັດ​ນຳ​ເຮົາ​ແນ່ນອນ, ຄວາມ​ສຳ​ຄັນ​ຂອງຄຳ​ຕອບ​ໃຫ້​ຄຳ​ຖາມ​ຂໍ້​ນີ້​ຄື: ປະ​ໂຫຍດ​ທີ່​ຈະ​ເກີດ​ຂຶ້ນຫຼັງ​ຈາກ​ທີ່​ເຮົ​າ​ເຮັດ​ໄປ​ແລ້ວນັ້ນ​ເອງ.

ສຸດ​ທ້າຍ​ຖ້າ​ໃຜ​ເວົ້າ​ໃຫ້​ວ່າ​ຫົດ​ຄຸ​ນ້ຳ​ກ້ອນ​ອັນ​ນີ້​ແລ້ວ​ເປັນ​ການ​ເຫີ່​ຕາມ​ກະ​ແສ ເຮັດ​ແນວ​ໄຮ້​ສາ​ລະ ກໍ​ບອກ​ໄປ​ເລີ​ຍ​ເນາະວ່າ​ມັນ​ມີ​ປະ​ໂຫຍ​ດ​ດັ່ງ​ທີ່​ເວົ້າ​ມາ​ນີ້ ຫຼື ຄ້ານບອກ​ກໍ​ເອົາ​ບົດ​ຄວາມ​ນີ້​ໄປ​ໃຫ້​ເພິ່ນ​ອ່ານ​ເລີຍ.

ຂໍ້​ມູນ​ເພີ່ມ​ເຕີມ: http://alsa.org/

Lao IT Dev Ice Bucket Challenge